شەوی ڕابردوو ژمارەیەك سەگ لە شێڵتەری ئاژەڵانی بێلانە لەناوچوون، سەرۆكی شارەوانی دەڵێت، كاری كۆكردنەوەیان ڕاگرتووە و پشكنین بۆ هۆكارەكەی دەكەن.
لەیلا عومەر عەلی، سەرۆكی نوێی شارەوانیی سلێمانی لە پەیامێكدا ڕایگەیاند، زۆر دڵگرانین بە ڕوودانی ئەو کارەساتەی دوێنێ شەوی شێڵتەری ئاژەڵانی بێلانە و لەناوچوونی کۆمەڵێک ئاژەڵ.
دەشڵێت، “وەک سەرۆکایەتیی شارەوانیی سلێمانی بڕیارماندا بە ڕاگرتنی کاری کۆکردنەوە و وەرگرتنی ئاژەڵانی بێلانە لە ئێستادا”.
سەرۆكی نوێی شارەوانی كە ڕۆژی پێنجشەممە 10ی شوبات دەستبەكاربوو، ڕوونیدەكاتەوە لە هەمان ڕۆژدا داوای لە بەرپرسی شێڵتەرەکە کردووە ڕاپۆرتێکی کورت و پوخت ئامادەبکات و، پێشنیار و داواکاری پێداویستی و کەموکوڕییەکانی شێڵتەرەکە بکاتە پاکێجێک تا لای خۆیانەوە ھەرچییان پێبکرێت جێبەجێی بکەن.
لەیلا عومەر ئەوەشی خستەڕوو، ھەر ئەمڕۆ نوێنەر و بەرپرسی پەیوەندیداریان ڕاسپاردووە بەدواداچوونی پێویست بکات و چەند سامپڵ و نمونەیەک بنێردرێت بۆ پشکنین بۆ ڤێرتینەری و تاقیگەی تایبەتمەند بۆ ئەوەی ھۆکارەکانی ئەو کارەساتە دیاری بکەن.
دووپاتیشیدەكاتەوە، بەدڵنیاییەوە کار لەسەر دانانی پلان و بەرنامەیەکی ووردتر دەکەین بۆ ڕێکخستن و بەڕێوەبردنێکی باشتری شێڵتەرەکە لە داھاتوودا.
