ئەدهەم بارزانی ئەندامی پێشووی سەرکردایەتیی پارتی دیموکراتی کوردستان مەترسی لەسەر ژیانی خۆی و خێزانەکەی دەخاتەڕوو و دەڵێت، “درۆن بەسەر ماڵەکەمدا دەسوڕێتەوە و دەبێت لایەنە پەیوەندیدارەکان ئاگاداربن مەترسی لەسەر ئەمنییەتی خۆم و منداڵەکانم هەیە”.
ئەدهەم بارزانی ڕوونکردنەوەیەکی بڵاوکردووەتەوە و ڕایگەیاندووە، ئێوارەی ئەمڕۆ فڕۆکەیەکی بێفڕۆکەوان بەسەر ماڵەکەیدا بەرە و فڕۆکەخانەی هەریر تێپەڕیوە.
ئاماژەی بەوەکردووە، لەگەڵ ئەوەی لایەنە پەیوەندیدارەکانیان ئاگادارکردووەتەوە بەڵام پاش چەند خولەکێک جارێکی دیکە فڕۆکە بێفڕۆکەوانەکە بەسەر ماڵەکەیدا سوڕاوەتەوە.
ئەدهەم بارزانی دەڵێت، “نیگەرانین لە ئەمنییەتی خۆم و منداڵەکانم، ئەم دۆخە بە مەترسی دەزانم لەسەرمان و پێویستە لایەنە پەیوەندیدارەکان ئاگاداربن”.
