دەستەی دەستپاكیی عێراق ئاشكرایكرد، بڕیاری دەستگیركردن و بردنەبەردەم دادگای بۆ 165 گەورە بەرپرس بەتۆمەتی گەندەڵیكردن دەركردووە.
ئەو بەرپرسانە پلەی باڵایان لە دەوڵەتدا هەبووە و بەشێكیان هێشتا لە دەسەڵاتدان، وەك فەرمانگەی لێكۆڵینەوە لە دەستەی دەستپاكیی عێراق دەڵێت.
لەنێو ئەو 65 كەسەدا كە 9 كەسیان بڕیاری دەستگیركردن و 56یان بڕیاری بردنەبەردەم دادگایان بۆدەركراوە، پەرلەمانتارێكی ئێستا و پێنج پەرلەمانتاری پێشووی عێراق هەن.
فەرمانگەی لێكۆڵینەوە لە دەستەی دەستپاكیی عێراق لە ڕاگەیەندراوێكدا ڕایگەیاندووە، لەنێو تۆمەتبارەكاندا دوو وەزیری پێشوو، بریكارێكی وەزیر كە ئێستا لە دەسەڵاتدایە و پارێزگارێكی ئێستا و چوار پارێزگاری پێشوو و پارێزگارێكی پێشووتر هەن.
ئاشكرایكردووە، بڕیارەكان 20 بەڕێوەبەری گشتی دەگرنەوە كە 11یان ئێستا لە پۆستەكانیاندان و هەشتیان بەڕێوەبەری گشتیی پێشوون و یەكێكیان پێشووترە، لەگەڵ 23 ئەندامی ئەنجومەنی پارێزگا كە بڕیارەكانی دەستگیركردن و بردنەبەردەم دادگا دەیانگرێتەوە.
