سه‌رچاوه‌یه‌ك له ده‌سه‌ڵاتی دادوه‌ریی عێراق ئاشكرایكرد، دادگای تاوانه‌كانی كه‌ربه‌لا، سزای له‌سێداره‌دانی به‌سه‌ر بكوژی عه‌بیر خه‌فاجی سه‌رۆكی شاره‌وانیی كه‌ربه‌لادا سەپاند.
سه‌رچاوه‌یه‌ك له ده‌سه‌ڵاتی دادوه‌ریی عێراق ڕایگه‌یاند، بەیانی ئەمڕۆ یەكشەممە دادگای تاوانەكانی كەربەلا، بكوژی عه‌بیر خه‌فاجی سه‌رۆكی شاره‌وانیی كه‌ربه‌لای دادگاییكردووە و سزای له‌سێداره‌دانی به‌سه‌ردا سه‌پاندووه.
ڕۆژی سێشەممە 10ی ئاب، عەبیر خەفاجی، بەڕێوەبەری شارەوانیی کەربەلا لەگەڵ دوو کارمەندی شارەوانیدا سەرگەرمی لابردنی زیادەڕۆیی بوون لە شاری کەربەلا، لەو کاتەدا تەقە لە سەرۆکی شارەوانی کرا و كوژرا.
ڕۆژی دواتر مسته‌فا كازمی سه‌رۆكوه‌زیرانی عێراق له شوێنی ڕووداوه‌كه له كه‌ربه‌لا، ده‌ستگیركردنی بكوژه‌كه‌ی ڕاگه‌یاند و ڕاده‌ستی دادگای كرد.
ڕۆژی 12ی ئاب، ئه‌نجومه‌نی باڵای دادوه‌ریی عێراق ڕایگه‌یاند، بكوژه‌كه‌ی عه‌بیر خه‌فاجی له ڕۆژی 22ی ئاب-دا دادگایی ده‌كرێت.
