وەزارەتی کارەبا لە ڕوونکردنەوەیەکی مەیدانیدا بۆ لیژنەی وزە و سامانە سروشتییەکانی پەرلەمانی کوردستان ڕایگەیاند، کەمبوونەوەی پێدانی کارەبا پەیوەندی بە کەمبوونەوەی بڕی بەرهەمهێنانەوە هەیە.
وەزارەتی کارەبا لە کاتی سەردانی لیژنەی وزە و سامانە سروشتییەکانی پەرلەمان ڕایگەیاندووە، “لەم سەردانە مەیدانییەدا، وەڵامی هەموو پرسیارەکانیان درایەوە و پوختەی پڕۆژەکە و پلانەکانی بۆ داهاتوو لە هەموو بوارەکان خرانەڕوو و تیشک خرایەسەر گرنگیی پڕۆژەکە بۆ باشترکردنی دۆخی کارەبا لە بواری ڕێکخستن و کۆنترۆڵکردنی”.
وەزارەتی کارەبا ڕاشیگەیاندووە، “بە پراکتیک ئەوەش بە لیژنەی پەرلەمان ڕاگەیەندرا کە کەمبوونەوەی ماوەکانی پێدانی کارەبا هیچ پەیوەندییەکی بە پێوەری زیرەکەوە نییە، بەڵکو لە پلەی یەکەمدا، پەیوەندی بە کەمبوونەوەی بڕی بەرهەمهێنان و بەرزبوونە و هەڵکشانی خواست لەسەر کارەبا هەیە”.
لە ڕوونکردنەوەکەدا وەزارەتی کارەبا ئاماژەی بەوەش کردووە، “پڕۆژەی پێوەری زیرەک قۆناغی باشی بڕیوە و لە ئاییندەیەکی نزیکدا، چەندین تایبەتمەندیی دیکەی باشی پێوەرەکە بەکاردەخرێن”.
