ئەستێرەی فەرەنسیی یانەی پاریس سان جێرمان، کیلیان مباپێ جەخت لەوە دەکاتەوە، لەگەڵ هیچ یانەیەک ڕێککەوتنی نەکردووە و سەرنجی لەسەر ئەنجامەکانی یانەکەیەتی.
دوای بردنەوەی پاریس سان جێرمان لە یانەی لیل بە ئەنجامی (5-1)، مباپێ بە میدیاکانی ڕاگەیاند، “من ڕاهێنەر نیم، بەڵام پێگەی نوێی مێسی لە سەنتەری هێرشبەری ئەو پێگەیەیە کە دەتوانێت لێیەوە بەباشترین شێوە یاریبکات و گوزارشت لە گەورەیی خۆی بکات، پێموایە ئەو پێگەیە بۆ ئەو گونجاوە”.
هەروەها دەڵێت، “پێموابێت لەئێستادا ئێمە باشین، دەبێت لەگەڵ نێیماریشدا یاریبکەین و خۆمان بگونجێنین، چونکە ئەو یاریزانەش دەتوانێت گۆڕانکاری دروستبکات، هیوادارین بەزووترین کات بگەڕێتەوە”.
لەبارەی ڕیاڵ مەدریدەوە بۆچوونی خۆی ئاشکرادەکات و دەڵێت، “یاریکردن بەرامبەر ڕیاڵ مەدرید زۆر شت دەگۆڕێت، تەنانەت ئەگەر سەربەستبم لە گفتوگۆکردن لەگەڵ هەر یانەیەکی دیکە، بەڵام ئەوکارە ناکەم، سەرنجم لەسەر یارییەکەی ڕیاڵ مەدرید و دروستکردنی گۆڕانکارییە، دوای ئەوە با بزانین چی ڕوودەدات، پێکهاتەکەمان ڕوحیەتی بردنەوەی بەرزە، هەمیشە دەجەنگین، کێبڕکێ دەکەین، زۆریشمان بردووەتەوە و هیوادارین جارێکی دیکە سەرکەوتووبین، چونکە دەمانەوێت جێدەستی خۆمان بەجێبهێڵین”.
