مەزڵوم عەبدی بە گوومانەوە لە شوێنی كوژرانی بەغدادی و جێگرەوەكەی دەڕوانێت، دەڵێت، ئەو ڕاستییە دەسەلمێنێت كە داعش لە دەرەوەی ناوچەكانی هەسەدەوە یارمەتیدەدرێت و دوای ڕاهێنان، ئەندامەكانی دەخزێنرێنە ناو گروپە چەكدارییەكانەوە.
چەند ڕۆژی ڕابردوو ئەبو ئیبراھیم قوڕەیشی، جێگرەوەی ئەبوبەكر بەغدادی خەلیفەی پێشووتری داعش، لە ناوچەیەكی سەر بە ئیدلب، كە لەژێر كۆنترۆڵی هێزەكانی توركیا و گروپە چەكدارەكاندایە و لە نزیك سنوورەكانی توركیا كوژرا، لەكاتێكدا پێشتریش ئەبوبەكر بەغدادی بەهەمانشێوە لە ناوچەكانی ژێر كۆنترۆڵی توركیا كوژرا.
لە نوێترین تویتیدا، مەزڵوم عەبدی فەرماندەی هێزەكانی سوریای دیموكرات – هەسەدە بە گومانەوە لەوە دەڕوانێت، پێیوایە کوژرانی ئەبو ئیبراھیم قوڕەیشی و ئەبوبەکر بەغدادی لە ئیدلب، ئەو ڕاستییە دەردەخات کە لە دەرەوەی ناوچەکانی ژێر دەسەڵاتی ھەسەدە، تیرۆریستان ھاوکاریی دەکرێن و دوای مەشقپێکردنیان، لە ناوچەی ئارامدا دەپارێزرێن، تا ئەو کاتەی لە چەندین گروپی جیاجیادا بە ناوی بەرگریی میلليیەوە بەکاردەھێنرێن.
