ئەو ئۆپەراسیۆنە تایبەتەی بەرەبەیانی ئەمڕۆ لە ئیدلب ئەنجامدرا، لەماوەی چەند ڕۆژی كەمی ڕابردوودا پلانی بۆدانراوە و “گەورە تیرۆرستێك” كراوەتە ئامانج، وەك ئەوەی ڕۆژنامەیەكی ئەمریكی دەیڵێت.
وەزارەتی بەرگریی ئەمریكا (پێنتاگۆن) بڵاویكردەوە، لەلایەن یەكەیەكی تایبەتی هێزەكانی سوپای ئەمریكاوە “ئۆپەراسیۆنێكی سەركەوتوو” لە شارۆچكەی ئەتمە، كە دەكەوێتە شاری ئیدلب و لەسەر سنووری توركیایە، ئەنجامدراوە.
ڕۆژنامەی (وۆڵ ستریت جۆرناڵ) لە زاری بەرپرسانی ئەمریكاوە بڵاویكردەوە، لە ئۆپەراسیۆنەكەدا فڕۆكەی جەنگیی جۆری ئاپاچی و فڕۆكەی بێفڕۆكەوان بەكارهێنراون.
دەشڵێت، “هێزی تایبەت بە بەشداری هێزی دیكە (كە ناوی ئاشكرانەكردووە و پێدەچێت مەبەستی هێزەكانی هەسەدە بێت) هەڵیانكوتاوەسەر ناوچەی ئەتمە لە پارێزگای ئیدلب-ی سوریا بۆ ماوەی زیاتر لە دوو كاتژمێر، بووەتە هۆی كوژرانی ژمارەیەك چەكدار و ڕووخانی هەندێك باڵەخانە”.
بەپێی وتەی شایەتحاڵان “هێزەكانی ئەمریكا بە زەمینی پێكدادانیان لەگەڵ هێزی بەرامبەردا ئەنجامداوە”.
شوێنی ئۆپەراسیۆنەكە باڵەخانەیەك بووە كە دەكەوێتە دووریی نزیكەی 15 میل لە گوندی باریشا-ی سوری كە ئەبوبەكر بەغدادی، سەركردەی پێشووی داعشی لە تشرینی یەكەمی 2019دا لێ كوژرا.
پێشتر جۆن كێربی، وتەبێژی پێنتاگۆن ئۆپەراسیۆنەكەی بە سەركەوتوو ناوبرد و ڕایگەیاند، هیچ زیانێك لەنێو هێزەكانی ئەمریكادا ڕووینەداوە و دواتر وردەكاریی پرۆسەكە ئاشكرادەكەن.
ناوچەكە كە سەربازانی ئەمریكا و هێزەكانی یاوەری بە فڕۆكە خۆیان پێگەیاندووە، لەژێر كۆنترۆڵی گروپە چەكدارەكانی سەر بە توركیایە، ڕۆیتەرز لە زاری شایەتحاڵانەوە دەڵێت، بینای توندڕەوێكی بیانی كراوەتە ئامانج.
شایەتحاڵان دەڵێن، گوێیان لە تەقەكردنێكی زۆر بووە، یەكێكیش لە دانیشتووان وتوویەتی ”چەندین كەس كوژراون”، پرۆسەكەش بە ڕۆیشتنی فڕۆكەكان كۆتایی هاتووە.
چارلز لیستەر، بەڕێوەبەر لە پەیمانگای ڕۆژهەڵاتی ناوەڕاست، كە بارەگاكەی لە واشنتنە، بە ڕۆیتەرزی وتووە، لەگەڵ دانیشتووانی ناوچەكە دواوە و وتویانە پرۆسەكە زیاتر لە دوو كاتژمێری خایاندووە.
وتیشی، “ئەوەی ڕوونە ئەوان ئامانجەكەیان ویستووە، هەر چۆنێك بێت” ئەوەشی وت، ”پێدەچێت ئەمە گەورەترین پڕۆسەی لەم جۆرە بێت” دوای ئۆپەراسیۆنەكەی سەر بەغدادی.
بەرپرسێك لە چەكدارە بەرهەڵسكارەكان، كە ناوی ئاشكرانەكراوە، ڕایگەیاندووە، ئەو ”جیهادییەی” گومان دەكرێت بەئامانجگیرابێت، لەگەڵ خێزانەكەیدا بووە كاتی ئۆپەراسیۆنەكە.
ئاشكراشیكرد، ئەندامانی ئاسایش لە دەستەی ئازادیی شام، ئەو گروپە سەرەكییەی كۆنتڕۆڵی چەندین ناوچەی لە باكووری ڕۆژئاوای سوریای كردووە، گەیشتوونەتە شوێنی ئۆپەراسیۆنەكە.
دەستەی ئازادیی شام كۆنترۆڵی بەشێكی بەرچاوی باكووری ڕۆژئاوای سوریای كردووە، كە پارێزگای ئیدلب و بازنەیەك لە ڕووبەری دەوروبەری دەگرێتەوە، گروپەكە كە پێشتر بە بەرەی نوسرە دەناسرا، بەشێك بوو لە ڕێكخراوی قاعیدە تا ساڵی 2016.
ژمارەیەك لە چەكدارانی بیانی لە دەستەكە جیابوونەتەوە و ڕێكخراوی پاسەوانانی دین (حراس الدین)یان پێكهێناوە و ئەوەش وەك ڕێكخراوێكی تیرۆرستی بیانی ناسێندراوە، لەماوەی چەند ساڵی كەمی ڕابردووشدا یەكێك لە ئامانجەكانی بۆردومانەكانی هاوپەیمانان بوون.
لای خۆیەوە ڕوانگەی سوری بۆ مافەكانی مرۆڤ بڵاویكردەوە لە ئۆپراسیۆنەكەدا لانیكەم 9 كەس كوژراون كە دوو منداڵ و ژنێكیان لەنێواندایە.
