بەشی پۆلیسی نەهێشتنی تاوانی پارێزگای سلێمانی دەستگیرکردنی دوو تۆمەتباری لە کاتی دزیکردندا ڕاگەیاند، دەستیش بەسەر کەلوپەلەکانیاندا گیراوە.
لە ڕاگەیەندراوێکدا بەڕێوەبەرایەتیی گشتیی پۆلیسی سلێمانی ئاشکرایکرد، مەفرەزەکانی بەشی پۆلیسی نەھێشتنی تاوانی نووسینگەی ڕۆژئاوا، دوو تۆمەتباریان لە کاتی تاوانی دزیکردندا دەستگیرکردووە و دەستیانگرتووە بەسەر ئەو کەلوپەلانەی تاوانەکەیان پێئەنجامداوە.
پۆلیسی سلێمانی ناسمانەی تۆمەتبارەکانی ئاشکراکردووە، بەناوەکانی (م، خ، ر) لەدایکبووی 1997 و (ھ، ع، ع) لەدایکبووی 1999.
بەپێی ڕاگەیەندراوی پۆلیس، ئەو دوو تۆمەتبارە دانیان بە تاوانەکەیاندا ناوە، بەپێی ماددەی 443 لە یاسای سزادانی عیراقی ڕاگیراون و لێکۆڵینەوە لەگەڵیاندا بەردەوامە.
