لە ساڵی 2004ەوە تەنها 53%ی ئەو خاك و ناوچانەی عێراق پاككراونەتەوە كە بە مین و پاشماوەكانی جەنگ چێندراون، وەك ئەوەی نوێنەری عێراق لە ڕێككەوتنی نێودەوڵەتی بۆ لابردنی مین ئاماژەی پێدا.
ئەحمەد عەبدولڕەزاق، نوێنەری عێراق لە ڕێككەوتنی نێودەوڵەتی بۆ لابردنی مین ڕایگەیاند، ڕووبەرە ژەهراوییەكان بە مین و پاشماوەكانی جەنگ و بۆمب لە سەرەتای بەرنامەی لابردنی مینەوە لە ساڵی 2004ـەوە تائێستا گەیشتوونەتە 6022 كیلۆمەتر چوارگۆشە.
وتیشی، “ئەو ڕووبەرە ژەهراوییەی ماوە بە 2761 كیلۆمەتر چوارگۆشە دەخەمڵێندرێت، بەو مانایەی زیاتر لە 53%ی كۆی ڕووبەری ژەهراوی لە عێراق پاككراوەتەوە”.
زۆرترین ناوچە ژەهراوییەكان لە ناوچەكانی باشوورن، بەتایبەت پارێزگای بەسرە كە بە ژەهراویترین پارێزگای عێراق بە مین دادەنرێت، دوای ئەو پارێزگا تازە ئازادكراوەكان دێن، دواتریش ناوچەكانی فوراتی ناوەڕاست، وەك ئەوەی بەرپرسە عێراقییەكە ئاماژەی پێدا.
ئەوەشی خستەڕوو، هەوڵەكانی هەڵگرتنەوەی مین و تەقەمەنی بەهاوكاریی ژمارەیەك ڕێكخراو و وڵاتانی جیهان بووە و هەوڵیش بۆ بەدەستهینانی پشتیوانی و هەماهەنگی لە وڵاتانی دیكە دەدەن.
بەرپرسەكەی بواری مین لە عێراق ڕوونیشیكردەوە، تێچووی هەڵگرتنەوەی مین جیاوازە لە زەخیرەی هێشوویی و لە پاشماوەكانی جەنگ و بۆمبی چێندراو، نرخی هەڵگرتنەوەیان بەپێی سروشتی خاك و هەڵكەوتەكەی و جۆری مینەكە دەگۆڕێت.
