لە ناحیەیەكی سەر بە پارێزگای دهۆك گەنجێك دوای ئاشكراكردنی گۆڕینی ڕەگەزی لە كوڕەوە بۆ كچ كوژرا، پۆلیسی شارەكە دەڵێت، تاوانەكە لەلایەن برایەكی خۆیەوە ئەنجامدراوە.
ئەمڕۆ لە نزیك گوندی بابوخکێ-ی سەر بە ناحیەی مانگێش لە پارێزگای دهۆك تەرمی گەنجێك دۆزرایەوە.
بەڕێوەبەرایەتیی پۆلیسی پارێزگای دهۆك بڵاویكردەوە، گەنجەکە ناوی (د.ئ.) و تەمەنی 23 ساڵە و خەڵکی پارێزگای دهۆکە.
دەشڵێت، تەرمەكە گەیەندراوەتە پزیشكی دادوەری و لێكۆڵینەوە دەستیپێكردووە.
وەك ئەوەی پۆلیسی دهۆك بڵاویكردووەتەوە، بكوژ خۆی حەشارداوە و بەپێی زانیارییەكانیان برای قوربانییەكەیە و لە كوردستان ناژی.
بەپێی زانیارییەكان پێشتر ئەو گەنجە لە تۆڕە كۆمەڵایەتییەكانەوە گۆڕینی ڕەگەزی خۆی لە كوڕەوە بۆ كچ ڕاگەیاندووە و چەندین وێنەی خۆیشی وەك كچ بڵاوكردووەتەوە.
