موقتەدا سەدر، دوای كۆبوونەوەی لەگەڵ نێردراوەكانی مەسعود بارزانی، كە پەیوەندی بە یەكخستنی ماڵی شیعە و جێكردنەوەی نوری مالكییەوە هەبوو، سووربوونی خۆی لەسەر حكومەتی زۆرینەی نیشتمانی دووپاتكردەوە.
ئەمڕۆ مەسعود بارزانی، سەرۆكی پارتی دیموكراتی كوردستان، بە دەستپێشخەرییەك هەریەك لە نێچیرڤان بارزانی و محەمەد حەلبووسی نارد بۆلای موقتەدا سەدر، دەیەوێت نێوماڵی شیعە ڕێكبخات و سەدر بەوە ڕازیبكات، نوری مالكی ببێتە جێگری سەرۆك كۆمار.
بەڵام دوای كۆبوونەوكە، سەدر تویتێكی كرد، نووسیویەتی، “تیرۆر و توندوتیژی دژی گەل و هاوبەشانمان ڕابگرن، “هێشتا لەگەڵ پێكهێنانی حكومەتی زۆرینەی نیشتمانیداین و پێشوازی دەكەین لە گفتوگۆكردن لەگەڵ ئۆپۆزسیۆنی نیشتمانیدا”.
پێداگیریی سەدر لەسەر حكومەتی زۆرینە لەكاتێكدایە، پێشتریش بەردەوام هەمان پەیامی داوە و دەیەوێت بەشێك لە لایەنەكانی چێوەی هەماهەنگی بچنە حكومەتەوە، بەڵام هێڵی سووری لەسەر نوری مالكی هەیە و ڕازی نییە بە بەشداریكردنی سەرۆكەكەی دەوڵەتی یاسا لە حكومەتی نوێی عێراقدا.
بە تویتەكەی ڕێبەرەكەی ڕەوتی سەدر بێت، پێدەچێت ڕەتكردنەوەی مالكی لەلایەن سەدرەوە بەردەوامی هەبێت، سەرەڕای دەستپێشخەرییەكەی بارزانی.
