دوێنێ یەکشەممە، ئیسماعیل قائانى فەرماندەی فەیلەقی قودسی سوپای پاسدارانی ئێران، بۆ گەیاندنی پەیامی ئێران و ڕابەری شۆرشی ئیسلامی، لە هەولێر بووە و پەیامەکەی بە مەسعود بارزانی ڕاگەیاندووە.
فارس نیوز، کە میدیایەکی ئێرانییە و نزیکە لە سوپای پاسدارانەوە، هەواڵەکە پشتڕاست دەکاتەوە و ڕایگەیاندووە، “دوێنێ ئیسماعیل قائانی سەردانی هەولێری کردووە و لەگەڵ بەرپرسانی پارتیدا کۆبووەتەوە”.
بەپێی زانیارییەکان، ئێران بە ڕوونی بە پارتی ڕاگەیاندووە، ڕازی نییە لەو هاوکێشەیەی ئێستا لە پێکهێنانی حکومەتی نوێی عێراقدا دەبینرێت.
دوای سەردانەکەی قائانی بە کەمتر لە 24 کاتژمێر، پارتی، لەڕێگەیە مەسعود بارزانی-ی سەرۆكیەوە، دەستپێشخەرییەكی ڕاگەیاند و نێچیرڤان بارزانی، جێگری سەرۆکی حزبەکەی ڕاسپارد، کە هاوشان لەگەڵ محەمەد حەلبووسی، سەردانی نەجەف بكەن و لەگەڵ موقتەدا سەدر كۆببنەوە.
پارتی، سەرد و سوننەكان، سێكوچكەی ڕێككەوتنێكن، كە چەند مانگێكە كراوە بۆ پێكهێنانی حكومەتی عێراق.
دەستپێشخەرییەکەی مەسعود بارزانی لەکاتێکدایە، لەماوەی چەند ڕۆژی ڕابردوودا ئێران لەگەڵ بەرپرسانی پارتیدا کۆبووەتەوە و لەبارەی پێكهێنانی حكومەتی نوێی عێراق و پرسی سەرۆك كۆمار و لێكەوتەكانیان، پەیامی ڕوونیان بە پارتی داوە.
هەوڵەكەی مەسعود بارزانی بەشێكی زۆری پەیوەندیی بە ناكۆكیی لایەنە شیعییەكانەوە هەیە، دەیەوێت ڕێكیان بخات، لەكاتێكدا بەهۆی كاندیدكردنی هۆشیار زێباری-ی خاڵی، لە هەرێمی كوردستان ناكۆكی و لێكترازانەی ناوەتەوە.
