ئەندامێكی ئەنجومەنی نوێنەران داوا لە پەرلەمانتارانی هاوەڵی دەكات پابەندبن بەو سوێندەی خواردویانە و كەسێك كە پێشتر بەتۆمەتی گەندەڵی دەستپێكێشانەوەی پێكراوە، بۆ پۆستی سەرۆك كۆمار كاندید نەكەن، لەو ڕووەشەوە دوو نووسراوی ئاراستەی سەرۆكایەتی ئەنجومەنی نوێنەران و دەستەی دەستپاكی كردووە.
عالیە نسەیف، ئەندامی ئەنجومەنی نوێنەران لە هاوپەیمانیی دەوڵەتی یاسا ڕایگەیاند، پێویستە سەرجەم پەرلەمانتاران پابەندبن بەو سوێندەی خواردویانە و چەسپاوبن بە بنەما ئەخلاقی و نیشتمانی و شەرعییەكان لەبەردەم گەلی عێراقدا، كەسێك بۆ سەرۆكایەتیی كۆمار هەڵنەبژێرن كە لە ئەنجومەنی نوێنەران بەهۆی بوونی گەندەڵیی ڕوون و بەڵگەدار لێپرسینەوەی لێكراوە لەبەردەم سەرجەم ئەندامانی ئەنجومەن، بە كۆی دەنگ دەستپێكێشانەوەی پێكرا و دۆسیەكانی ڕەوانەی دادگا كرا.
نسەیف وتیشی، “گەندەڵی نافەوتێت بەهۆی كۆنبوونەوە، وەك ئەوەی هەندێك پێیانوایە، كاندیدكردنی كەسێكی دەستپێكێشاوە بەهۆی گەندەڵییەوە بۆ پۆستی سەرۆك كۆمار سووكایەتییە بە دەوڵەتی عێراق و یاسا و دەسەڵاتی یاسادانان، كە بەرپرسە لە دانانی ئەو یاسایانەی دادگا جێبەجێیان دەكات”.
پەرلەمانتارەكەی دەوڵەتی یاسا دوو نووسراوی فەرمیی ئاراستەی هەریەك لە دەستەی سەرۆكایەتیی ئەنجومەنی نوێنەران و دەستەی دەستپاكی كردووە.
لە نووسراوەكەدا بۆ دەستەی دەستپاكی، ئەو پەرلەمانتارە داوای ژمارەی ئەو دۆسێیانەی گەندەڵی دەكات كە دژ بە هۆشیار زێباری ڕەوانەیان كراوە، كە لەنێو لێپرسینەوەكەی ئەوكاتی ئەنجومەنی نوێنەراندا هاتووە، هەروەك داوای ئاشكراكردنی ئەو دۆسێیانە دەكات كە لێبوردن دەیانگرێتەوە، كە تیایدا ئەو زیانە لەخۆدەگرێت كە لەلایەن هۆشیار زێباری-یەوە بە دەوڵەت گەیشتووە.
بەپێی یاسای ژمارە 8ی ساڵی 2012 (یاسای ئەحكامی پاڵاوتن بۆ پۆستی سەرۆك كۆمار) و لە ماددەی یەك بڕگەی سێیەمدا هاتووە، پاڵێوراو (پێویستە خاوەن ناوبانگی باش و شارەزایی سیاسی بێت و دەستپاك و دادگەر و بەئەمەك بێت بۆ نیشتمان).
لەو بارەیەوە ئەو پەرلەمانتارە لە نووسراوەكەیدا بۆ ئەنجومەنی نوێنەران دەڵێت، هۆشیار زێباری بەپێی ماددەی (61) بڕگەی حەوتی دەستوور لێپرسینەوەی لەگەڵ كراوە و لە ئەنجومەنی نوێنەران دەستپێكێشانەوەی پێكراوە و دۆسیەكانی ڕەوانەی دەستەی دەستپاكی كراون، بۆیە پاڵاوتنی لێدانە لە بەرزترین دەسەڵاتی یاسادانان.
دوای ئەوەی لە چەند ڕۆژی ڕابردوودا شەپۆلێکی بەرفراوانی ناڕەزایی عێراقییەکان دژی کاندیدکردنی هۆشیار زێباری بۆ پۆستی سەرۆک کۆمار سەریهەڵدا، دوێنێ ناڕەزایەتییەکان گەیشتنە ڕادەی خۆپیشاندان.
سەرەتا ناڕەزایەتییەکان لەڕێگەی تۆڕە کۆمەڵایەتییەکان و بڵاوکردنەوەی هاشتاگ و هەڵواسینی لافیتە و پۆستەر لە شەقام و شوێنە گشتییەکانی بەغداد و چەند شوێنێکی دیكە دەستیانپێکرد.
دوێنێ هەینی-ش لە گۆڕەپانی تەحریری ناوجەرگەی بەغداد کە شوێنی ناڕەزایی دەربڕینی خۆپیشاندەرە تشرینییەکانە دژی گەندەڵی، خۆپیشاندان دژی کاندیدکردنی هۆشیار زێباری بۆ پۆستی سەرۆک کۆمار دەستیپێکرد و خۆپیشاندەران لە دروشمەکانیاندا ئاماژە بۆ ئەوە دەکەن، قایلنابن کەسێک کە بەهۆی گەندەڵییەوە متمانەی لێسەندرابێتەوە، کاندیدی پۆستی سەرۆکی وڵات بێت.
