دەستەی پیشەسازیی جەنگیی عێراق دەڵێت، لەمساڵدا پلانی نوێ بۆ دروستكردنی چەك سووك و مامناوەند دەستپێدەكات بەمەبەستی پڕكردنەوەی پێداویستییەكانی ناوخۆ و پشتیوانیكردنی ئابوریی نیشتمانی، بۆ ئەو مەبەستەش مانگی داهاتوو كارگەیەك وەردەگرێتەوە.
محەمەد دەراجی، سەرۆكی دەستەی پیشەسازیی جەنگی ڕایگەیاند، دەستەكەیان هەوڵی زۆری خستووەتەكار بۆ سەرلەنوێ بەگەرخستنەوەی پیشەسازیی جەنگیی بەرگری بە توانای بەردەست، بۆ زامنكردنی دروستكردنی چەكی سووكی ناوخۆ.
وتیشی، “لەمساڵدا هێڵەكانی دروستكردنی تایبەت بە چەكی مامناوەند و سووك، وەك دەمانچە و چەك و كەلوپەلە پێویستەكانی دەستپێدەكەنەوە”.
ئامانج لە كردنەوەی ئەو هێڵە گەیشتنە بە توانای ناوخۆ لەو ڕووەوە و هاوكاریكردنی هێزە سەربازی و ئەمنییەكان، بەجۆرێك چەك و كەلوپەلی پێویستی لەبەردەستدا بێت، وەك ئەوەی سەرۆكی دەستەكە دەیڵێت، “ئەو هەنگاوەش كاریگەریی گەورەی لەسەر ئابوریی عێراق و ئاسایشی نەتەوەیی دەبێت”.
ڕووداوەكانی پاش ساڵی 2003 كاریگەریی نەرێنی زۆری لەسەر پڕۆژەی بەرهەمی جەنگی لە عێراق دروستكرد، بەتایبەت دوای ئەوەی زۆرینەی كارگەكانی دروستكردنی چەك ڕووبەڕووی تاڵانكردن بوونەوە.
دەراجی ئاشكرایكرد، مانگی داهاتوو دەستەكەیان كارگەی “حاموڕابی” وەردەگرێتەوە، كە لە ساڵانی ڕابردوودا ڕووبەڕووی تێكدان و دزین بووەوە، بە ئامانجی سەرلەنوێ ئامادەكردنەوە و دامەزراندنی هێڵی بەرهەمهێنانی تایبەت بە چەك و فیشەك و تەقەمەنی.
ڕوونیشیكردەوە، “كارگەی حاموڕابی پێشتر تایبەت بوو بە دروستكردنی دەمانچەی ناسراو بە (تارق)، كار لەسەر پەرەپێدان و دروستكردنەوەی دەكەین لەژێر ناوی (بابل)”.
بەپێی وتەی سەرۆكی دەستەی پیشەسازیی جەنگی، عێراق خاوەن شارەزایی گەورەیە لە پیشەسازیی سەربازی، پشتیش بە هەندێك لە شارەزایی گەنجان دەبەستن كە لە وەزارەتی بەرگری دامەزرێندراون، لەڕێی تەنسیبكردنیان بۆ كارگەكە.
جگە لە دەمانچەی تارق، پێشتر كلاشكۆفی جۆری تبوك لەلایەن كارگە سەربازییەكان لە عێراق دروستدەكران.
