حەشدی شەعبی دەڵێت، ڕێگرییان كردووە لە دزەكردنی ژمارەیەك لە چەكدارانی داعش لە باشووری شەنگال.
ئەمڕۆ حەشدی شەعبی ڕاگەیەندراوێكی بڵاوكردەوە، ئاشكرایكردووە، هێزی شەنگالی فەرماندەیی ئۆپەراسیۆنەكانی نەینەوا لە دەستەی حەشدی شەعبی، بەرەبەیانی ئەمڕۆ چوارشەممە ڕێگرییان كردووە لە دزەكردنی ژمارەیەك لە چەكدارانی داعش لە باشووری قەزای شەنگال.
بەوتەی حەشدی شەعبی، ژمارەیەك چەكداری داعش بوون و ویستوویانە دزەبكەنە قەزای شەنگالەوە، بەڵام تەقەیان لێكراوە و ناچار بە هەڵاتن كراون.
قسەی حەشدی شەعبی لەبارەی ڕێگریكردن لە دزەكردنی چەكدارانی داعش بۆ چوونە شەنگال هاوكاتە لەگەڵ ڕووداوەكانی چەند ڕۆژی ڕابردووی حەسەكەی ڕۆژئاوای كوردستان، كە تیایدا داعش هەوڵی هەڵاتنی چەكدارانی زیندانیكراوی دا لە زیندانی غوێران، بەڵام لەلایەن هەسەدە و هێزەكانی دیكەی ڕۆژئاوای كوردستانەوە ڕێگرییان لێكرا و پیلانەكە پوچەڵكرایەوە.
