بافڵ جەلال تاڵەبانی بە سەرۆكایەتی شاندێكی باڵای یەكێتی گەیشتە بەغداد و بڕیارە زنجیرەیەك دیدار و كۆبوونەوە ئەنجامبدات.
سەردانەكە دوابەدوای كۆبوونەوەكەی دوێنێی ئەنجومەنی سەركردایەتیی یەكێتیی نیشتمانیی كوردستان دێت كە تیایدا بڕیاردرا پشتگیری تەواوبكرێت بۆ سەرخستنی كاندیدی حزبەكە پۆستی سەرۆك كۆمار كە د. بەرهەم ئەحمەد ساڵح-ە.
لەمیانەی سەردانەكەدا بڕیارە بافڵ جەلال تاڵەبانی و شاندی یاوەری زنجیرەیەك دیدار و كۆبوونەوە لەگەڵ هێز و لایەنە سیاسییە عێراقییەكاندا ئەنجامبدات.
دوێنێ ئەنجومەنی سەركردایەتیی یەكێتی لە سلێمانی كۆبووەوە و لە پرسی تایبەت بە بارودۆخی سیاسیی عێراق و ئیستحقاقە دەستوورییەكاندا ڕایگەیاند، ”پارتی دیموكراتی كوردستان تاكڕەوانە و لە دەرەوەی ویست و ئیرادەی یەكڕیزیی گەلی كورد و هێزە سیاسییەكانی كوردستان هەنگاویناوە و ڕێککەوتنیان لەگەڵ هەندیک لایەنی سیاسی واژوو کردووە و لە چێوەی ئەو ڕێککەوتنەیان كاندیدێكی خۆی بۆ پۆستی سەرۆک کۆمار پێشكەشكردووە”.
باسیلەوەشكرد، “بافڵ جه‌لال تاڵه‌بانى بەووردی ڕووناكی خستەسەر پێشهاتەكانی ئێستا و جەختیکردەوە کە مادەم لایەنی دیکە، دوور لە پرینسیپی تەوافق کاندیدی خۆیان پێشکەش دەکەن، یەکێتیش مافی خۆیەتی كە پۆستی سەرۆك كۆمار بە ئیستیحقاقی كورد و یەكێتیی نیشتمانیی كوردستان بزانێت، بۆیە داكۆكی لە مافی خۆی دەکات و سازشی لەسەر ناکات”.
