عەلی حەمەساڵح، سەرۆکی لیژنەی وزە لە پەرلەمانی کوردستان ڕایگەیاند، کێشەی غاز پەیوەندیدارە بە نەگەیاندنی بڕەغازی تایبەت بە هاوڵاتییان و بردنی بۆ بازرگانی و گەندەڵی، ئەوە جگە لەوەی .
لە لێدوانێکی ڕۆژنامەوانیدا عەلی حەمەساڵح ڕایگەیاند، لێکۆڵینەوەمان لەسەر دابەشکردنی نەوتی سپی، گرانبوونی گازوایل کە هۆکارێکە بۆ گرانبوونی کرێی مۆلیدە ئەهلییەکان، هەروەها قەیرانی غاز بەتایبەت لە پارێزگای سلێمانی کردووە.
بەپێی بەدواداچوونی سەرۆکی لیژنەی وزە، “تائێستا 69 ملیۆن لیتر نەوتی سپی دابەشکراوە، لەکاتێکدا بۆ هەر ماڵێکی کوردستان ئەگەر بەرمیلێک نەوت وەربگرێت، هەموو هەرێمی کوردستان پێویستی بە 259 ملیۆن لیتر نەوت دەبێت، واتە تائێستا 75%ی خەڵکی هەرێمی کوردستان نەوتیان وەرنەگرتووە”.
”لەکاتێکدا ئەگەر بەمشێوەیەی ئێستا نەوت دابەشبکرێت، وەرزی سەرما کۆتاییدێت و نەوت بەتەواوی ناگاتە هاوڵاتییان”، عەلی حەمەساڵح وادەڵێت.
سەبارەت بە کێشەی بەنزین وتی، “ئێستا جگە لەو بڕە بەنزینەی لە بەغدادەوە دێت، ئەو بەنزینەی لە پاڵاوگەی (کار) دەپاڵێورێت 950 هەزار بەرمیلە لەڕۆژێکدا، ئەمە بە دادپەروەری مامەڵەی پێوەناکرێت لە سەرتاسەری هەرێمی کوردستان، بەڵکو دەدرێت بە دوو کۆمپانیا و ئەوان مامەڵەی پێوەدەکەن لەبازاڕدا”.
عەلی حەمەساڵح هەر لەبارەی بەنزینەوە ئاشكرایكرد، “یەک ساڵە داوادەکەین، بەڵام ئامادەنین یەک لیتر بەنزینی حكومەت، كە دراوە بە كار، بدەن بە سلێمانی، بۆیە داوامان کردووە ئەو بەنزینەی لە عێراقەوە دێت، لەگەڵ ئەو بەنزینەی ناوخۆ، نزیکەی دوو ملیۆن لیتر بەنزین دەبێت بە دادپەروەری دابەشبکرێت بەسەر هەموو هەرێمی کوردستاندا، بەوە تاڕادەیەک کێشەی بەنزین چارەسەر دەبێت”.
سەرەڕای ئەوەش، بەپێی وتەی پەرلەمانتارەكە، “ژمارەیەک شوێنی بێمۆڵەت جۆرە بەنزینێکی 690 دیناری دەفرۆشن، کە نە بەنزینی عێراقە، نە بەنزینی کارە، جۆرێکی زۆر خراپ و کوالێتیی نزم و مەترسیدارە، لەگەڵ ئەوەی داوامانکردووە ئیجرائاتیان لەگەڵ بکرێت دابخرێن و سزابدرێن، بەڵام ئێستاش هەر هەن و ئەو جۆرە بەنزینە دەفرۆشن”.
سەرۆكی لیژنەی سامانە سروشتییەكان باسی لە کێشەی غازیش کرد و وتی، ئێستا بەرهەمی ڕۆژانەی غاز 50 تانکەرە، کە دەکاتە نزیکەی 1050 تۆن، 10 تانکەری بۆ دهۆک و 15 تانکەری بۆ هەولێرە و نزیکەی 15 تەنکەریشی بۆ سلێمانییە، لە هەولێر هەموو ڕۆژێک دەبێت 24 هەزار و 990 بوتڵی غاز بگات، سلێمانی دەبێت ڕۆژانە 24 هەزار بوتڵ بگات و نزیکەی 16 هەزار و 60 بوتڵ بگاتە دهۆک.
عالی حەمەساڵح ڕوونیشیكردووەتەوە، ئەو غازە 40 تانکەری بۆ هاوڵاتییە و 10ی بۆ بازرگانییە، کێشەی غاز بەهۆی ئەوەوەیە کە بڕی 40 هەزار بوتڵ غازەکەی هاوڵاتییان وەک خۆی ناگات، بەشێکی بەڕێگەی بازرگانی و گەندەڵی دەبردرێت، بەدڵنیایی کۆنترۆڵی ئەم بڕە بکرێت و بە ڕێکوپێکی بگاتە خەڵک، شتێک نامێنێت لە هەرێمی کوردستان بەناوی کێشەی غاز.
