وەزارەتی پەروەردەی حكومەتی هەرێمی كوردستان بەهۆی دابەزینی پلەكانی گەرما پشووی ناوەندەكانی خوێندنی حكومی و ناحكومی درێژكردەوە.
ئالان حەمە سەعید، وەزیری پەروەردەی هەرێم، لە ڕاگەیەندراوێكدا ئاماژەی بەوەكردووە، ” بەمەبەستی پاراستنی سەلامەتی گیانی مامۆستایان و خوێندکاران بەهۆی دابەزینی پلەکانی گەرمی پاش هەڵسەنگاندنی وەزارەتی گواستنەوە وگەیاندن بەڕێوەبەرایەتی گشتیی کەشناسی و بومەلەرزەزانی هەرێم، بریارماندا لە سەرجەم ناوەندەکانی خوێندنی ( حکومی – ناحکومی پشوو دەبێت تا رۆژی یەکشەممە 30ی 1ی 2022.”
باسیلەوەشكردووە، ئەو هەڵسەنگاندن و تاقیکردنەوانەی وەرزی یەکەم کە ئەنجامنەدراون لە ڕۆژی دووشەممە 31ی 1ی 2022 دەستپێدەکرێتەوە، کارگێڕیی ناوەندەکانی خوێندن خشتەی ئەو تاقیکردنەوانەی کەماون بۆ خوێندکاران ڕادەگەیەنن بەمەرجێک بەیانیان لە کاتژمێر 9:30 ی بەیانی دەستپێبکات، پاش ئەنجامدانی ئەو تاقیکردنەوانەی کە ماون خوێندنی وەرزی دووەم دەستپێدەکات .
وەزیری پەروەردە ڕوونیشیكردووەتەوە، لە خوێندنگەكانی (سابیس ) و (نێودەوڵەتییەکان) و ( بیانییەکان ) کە پرۆگرامی تایبەتیان هەیە دەتوانن تا وادەی ئاماژەپێکراو بە شێوازی خوێندنی ئۆنلاین بەردەوام بن.
جەختیشی كردووەتەوە، ئەنجومەنی وەزارەتی پەروەردە بۆ قەرەبووکردنەوەی ماوەی لەدەستچوو، ساڵنامەی خوێندن هەموار دەکاتەوە.
