شارەزایەکی بواری کەشناسی رایدەگەیەنێت، لەم هەفتەیەدا شەپۆلێکی بارانبارین ڕوو لە ناوچەکەمان دەکات و هەورەبروسکەشی لەگەڵ دەبێت.
ئاراس جەبار، شارەزای بواری کەشناسی ڕایگەیاند، لە ئەنجامی بەردەوامیی کاریگەریی بارستەهەوای ساردی جەمسەری باکوور و کاریگەریی لاوازی نزمەپاڵەپەستۆی دەریای سوور، سبەی شەممە، ئاسمانی هەرێمی کوردستان بەتایبەت لەکاتەکانی دوای نیوەڕۆدا، بە زۆری دەگۆڕێت بۆ نیمچەهەور و لەکاتەکانی ئێوارە و شەودا، شەپۆلێکی مامناوەند و پچڕپچڕی بارانبارین سنووری پارێزگای دهۆک دەگرێتەوە و بۆ ڕۆژی یەکشەممەش، ناوچەکانی ئیدارەی سۆران و ڕاپەڕین و پارێزگای هەولێر و سلێمانی و هەڵەبجە و کەرکوک و ئیدارەی گەرمیان دەگرێتەوە، بارانی مامناوەند و پچڕپچڕ دەبارێت و لە هەندێک کات و شوێنیشدا، هەورەبروسکە چالاک دەبێت.
ئاماژەی بەوەشکرد، کاریگەریی ئەو ناجێگیرییە لە کەشی ناوچەکانمان تاوەکو بەرەبەیانی ڕۆژی دووشەممە، بەردەوامیی دەبێت و پاشان کەش جێگیر دەبێتەوە، پلەی گەرمییش جێگیر دەبێت.
دەشڵێت، لەگەڵ نەمانی کاریگەریی ئەو بارانبارینە، لە ئێوارەی دووشەممەوە، بەرزەپاڵەپەستۆی سیبیری لەسەر ناوچەکانی باکووری ئێران چالاک دەبێت و ئەمەش دەبێتەهۆی جێگیربوونی کەشوهەوا لە ناوچەکانمان و چالاکبوونی بای باکووری ڕۆژهەڵات لە ناوچە سنوورییەکانی ڕۆژهەڵاتی هەرێمی کوردستان، ئیدارەی ڕاپەڕین و بەتایبەت پارێزگای سلێمانی، خێرای بایەکە زیاتر دەبێت لەنێوان 15-45کم لە کاتژمێرێکدا، کاریگەرییەکەی تا ڕۆژی چوارشەممە، بەردەوامیی دەبێت، پلەی گەرمییش لەو ماوەیەدا لە ناوچەکانی سنووری گەرمیان و هەولێر و دهۆک و کەرکوک بەرزبوونەوەی زیاتر بەخۆیەوە دەبینێت، بەڵام لە ناوچە شاخاوئیە سنوورییەکانی ڕۆژهەڵاتی هەرێمی کوردستان و سنووری پارێزگای سلێمانی و ئیدارەی ڕاپەڕین و سۆران و هەڵەبجە بە جێگیری دەمێنێتەوە.
