هەرچەندە ساڵی ڕابردوو زۆربەی بەروبوومە كشتوكاڵییەكانیان لەلایەن سوپای توركیاوە لەناوبران و سوتێنران، دانیشتووانی عەین عیسا لە ڕۆژئاوای كوردستان سوورن لەسەر ئەوەی ئەمساڵیش زەوییەكانیان بكێڵن و بەردەوامبن لە كشتوكاڵ.
لە ئێستادا لە ڕۆژئاوای كوردستان و سوریا لە دەستپێكی وەرزی زستان جوتیاران سەرقاڵی ئامادەكارین بۆ بەرهەمهێنانی گەنم و جۆ، زۆربەی جوتیارەكانی ناوچەی گرێ سپی پشت دەبەستن بە زەوییە دەیمییەكانیان كە پشت بە باران دەبەستێت، بەڵام بۆ پاراستنی بەرهەمەكانیان لە نێو زەوییەكانیاندا بیری گەورەی ئیرتیوازییان دروستكردووە و لەڕێی ئامێرەوە بەرهەمەكانیانی تێدا هەڵدەگرن.
لە گرێ سپی ئەمساڵ ئەو زەویانەی پلان هەیە كشتوكاڵیان تێدا بكرێت پێكدێت لە 148 هەزار و 290 دۆنم زەوی بەراو و 319 هەزار و 682 دۆنم زەوی دەیم.
تۆفیق شەبلی، یەكێك لە جوتیارەكانی ڕۆژئاوا بە ئاژانسەكەی ڕاگەیاندووە، “كشتوكاڵ خۆی لەخۆیدا بەرخۆدانە دژ بە داگیركاران، هەروەها زەوییەكانمان خۆشەویستە لامان و دەستبەرداری نابین و كشتوكاڵی تێدا دەكەین گەر بێت و هەزاران جاریش بیسوتێنن”.
بەگوێرەی ئامارێكی كشتوكاڵی گرێ سپی، زستانی ساڵی ڕابردوو 63 هەزار دۆنم زەوی كشتوكاڵی، بەهۆی بۆردوومانە هەڕەمەكییەكانی سوپای توركیا و هێزەكانی سەر بەو سوپایە سوتان و لەناوچوون.
