شەوی ڕابردوو لە گەڕەکی فەرمانبەرانی شاری هەولێر ئەفسەرێکی خانەنشینکراوی پێشمەرگە لەلایەن خزمێکی خۆیەوە کوژراوە و بکوژەکە تا ئێستا دەستگیرنەکراوە.
پۆلیسی هەولێر لەبارەی ڕووداوەکەوە دەڵێت، “دوای ئەوەی شەوی ڕابردوو ڕووداوێکی کوشتن لە گەڕەکی فەرمانبەرانی شاری هەولێر ڕوویدا، کە تیایدا کەسێک لەسەر کێشەیەکی کۆمەڵایەتی بە ناوی (کاوە خەسرۆ شەریف) پیشە ئەفسەری خانەنشینی پێشمەرگە کوژرا، دەستبەجێ هێزەکانی بەڕێوەبەرایەتیی پۆلیسی پارێزگای هەولێر گەیشتنە شوێنی مەبەست و دەستیان بە لێکۆڵینەوە کرد، لە ئەنجامی لێکۆڵینەوەکانیش دەرکەوت تۆمەتبارێک بە ناوی (ز. خ. ش) کە کەسی نزیکی کوژراوەکەیە، هەڵساوە بە ئەنجامدانی تاوانەکە”.
پۆلیس ئاماژەی بەوەشکردووە، “پەڕاوی لێکۆڵینەوە بۆ ڕووداوەکە کراوەتەوە و فەرمانی دەستگیرکردنیش بۆ بکوژەکە دەرچوو بەپێی ماددەی (406) لە یاسای سزادانی عێراقی”.
