كۆشكی سپیی ئەمریكا سوورە لەسەر ئەوەی ڕوسیا بەتەواوی ئامادەیە بۆ هێرشكردنە سەر ئۆكرانیا، وەزیری دەرەوەی ئەمریكاش دەچێتە كیێڤ و دواتر لە سویسرا كۆبوونەوە لەگەڵ هاوتا ڕوسییەكەی دەكات.
جین ساکی، وتەبێژی کۆشکی سپی لە كۆنفرانسێكی ڕۆژنامەوانیدا هۆشداریی دا لەوەی، ڕوسیا ئامادەیە بۆ هێرشكردنە سەر ئۆكرانیا و “ئێمە ئێستا لە قۆناغێکداین کە دەکرێت ڕوسیا لە هەرکاتێکدا بێت هێرشە چاوەڕوانكراوەكەی بۆسەر ئۆکرانیا ئەنجامبدات”.
ساكی دۆخەكەی بە “زۆر مەترسیدار” وەسفكرد و وتی، “هەموو ئەگەرەکان کراوەن”.
وتەبێژەكەی کۆشکی سپی هەڕەشەی لە ڕوسیاش کرد، کە ئەگەر دەستببات بۆ هێرشکردنەسەر ئۆکرانیا، “ڕووبەڕووی سزای ئابوریی زۆر توند دەبێتەوە”، سەرزەنشتی ڤلادمێر پوتین سەرۆکی ڕوسیاشی کرد بەوەی “سەرۆک پوتین هۆکاری درستبوونی ئەو قەیرانەیە”.
ئەمە دووەم جارە ئەمریكا بە دڵنیاییەوە باس لە ئەگەری هێرشی ڕوسیا بۆسەر ئۆكرانیا دەكات.
هەر لەو نێوەندە، ئەنتۆنی بلینکن وەزیری دەرەوەی ئەمریکا ئەمڕۆ چوارشەممە، گەیشتە ئۆکرانیا و لەبارەی ئاڵۆزییەکانی سەر سنوور گفتوگۆ دەكات، چەند ڕۆژی داهاتووش لە جنێڤی سویسرا لەگەڵ سێرگی لاڤرۆڤ وەزیری دەرەوەی ڕوسیا كۆبوونەوە و گفتوگۆی لەبارەی هەمان پرس دەبێت.
