کارەبای سلێمانی ڕەخنە لە بەشی باخچەکانی شارەكە دەگرێت، کە بەهۆی هاوکارینەکردنیان بۆ هەڵپاچین و دوورخستنەوەی درەختەکان لە تۆڕەکانی کارەبا، لە بارینی بەفردا زیان بە 100 فیدەری دابەشکردنی کارەبا گەیشتووە، نیگەرانن لەوەی ساڵانە لەوەرزی زستاندا ئەو گرفتە دووبارە دەبێتەوە.
لە ڕاگەیەندراوێکدا بەڕێوەبەرایەتیی کارەبای سلێمانی زیانەکانی سەر تۆڕەكانی کارەبای بەهۆی بەفربارینی شەو و ڕۆژی ڕابردوو بڵاوکردەوە، کە زیان بە زیاتر لە 100 فیدەرى دابەشکردنى کارەباى سنوورى پارێزگاى سلێمانى گەیشتووە، تەنیا لە سنوورى بەڕێوەبەرایەتیی دابەشکردنى کارەباى سلێمانى 67 فیدەر زیانیان پێگەیشتووە، هەروەها حەوت بگۆڕ “محەویلە”ی کارەبا سووتاون.
ڕاشیگەیاندووە، لەکۆی زیانەکان، دوێنێ 50 فیدەری کارەبا چاککراونەتەوە و ئەمڕۆش 10 فیدەری دیکەیان چاکدەکرێنەوە.
کارەباى سلێمانى لە ڕاگەیەندراوەكەیدا هۆكاری زیانی سەر تۆڕەكانی كارەبا بۆ درەختی سەر شەقامەکان دەگێڕێتەوە، کە بوونەتەهۆی دروستبوونى شۆرتى کارەبا و کەوتنى فیدەرەکان، ڕەخنەی ئەوەی گرتووە كە “بەشی باخچەکانی سلێمانی هاوکارمان نین لە هەڵپاچینى درەختەکان و دوورخستنەوەیان لە تۆڕەکانى کارەبا و ئەوەش لەوەرزى زستاندا کێشە بۆ تۆڕەکانى دابەشکردنى کارەبا دروست دەکات”.
بەڕێوەبەرایەتیی کارەبای سلێمانی ئاماژەی بەوەکردووە، لە دەرەوەى شارى سلێمانى و ئیدارەى ڕاپەڕین و دوکان و چەمچەماڵ ژمارەیەک فیدەرى کارەبا کێشەیان بۆ دروستبوو، تیمەکانى چاکسازیی تۆڕەکان توانییان زۆربەیان چارەسەر بکەن و کارەبایان بۆ بگەڕێننەوە.
