هەندێک لە یانە گەورەکانی ئینگلتەرا فشاریان لەسەر ڕایەڵەی یانە پیشەگەرەكان دروستکردووە، تاوەکو لێکۆڵینەوە لە یانەی لیڤەرپوڵ بکات.
ماڵپەڕی “ئەتلەتیک” ئاشکرایکردووە، لەماوەی ڕابردوودا بەهۆی زۆری تووشبووان بە کۆرۆنا لە یانەی لیڤەرپوڵ و لەسەر داوای خودی یانەكە، ڕووبەڕووبوونەوەی جامی کاراباو بەرامبەر ئارسیناڵ بۆ کاتێکی دیکە دواخراوە، ئەوەش زیانی بە یانەی ئارسیناڵ گەیاندووە و چووەتە چێوەی جیاکاری یانەیەک لەیانەکانی دیکە، بەڵام دواتر دەرکەوتووە تێستی یاریزانانی یانە سوورە زەبەلاحەکە هەڵەی تێدابووە.
یۆرگن کلۆپ، ڕاهێنەری لیڤەرپوڵ دانی پێداناوە کە تێستی زۆرینەی تووشبووانی لیڤەرپوڵ هەڵەی تێدابووە و لەڕاستیدا هەڵگری ڤایرۆسەکە نەبوون، تەنها یەک یاریزان نەبێت، بەپێی ڕێنمایی و ڕێکارە تەندروستییەکانی ئینگلتەراش، لەبەر یەک یاریزان یارییەک دواناخرێت.
بەم هۆیەوە هەندێک لە یانە گەورەکان، لەنێوانیاندا یانەی ئارسیناڵ پەستانیان خستووەتەسەر ڕایەڵەی یانەکانی ئینگلتەرا تاوەکو لێکۆڵینەوە لە یانەی لیڤەرپوڵ بکات، ئەگەر تۆمەتەکانیش بەسەریاندا ساغببێتەوە، سزای دوورخستنەوە یاخود دارایی بەسەریاندا دەسەپێنرێت.
