لیژنەی ئەمریکی بۆ ئازادییە ئاینییەکان لە ئیدارەی خۆسەری ڕۆژئاوا ڕایگەیاند، بوونی سوپای تورکیایان لە ڕۆژئاوا ڕەتکردووەتەوە و داواشیان کردووە خاکی وڵاتەکەی بەجێبهێڵێت، ئەمەش وەك كاردانەوەیەك بەرامبەر هێرش و بۆردوومانەكانی توركیا بۆسەر ڕۆژئاوا و كەوتنەوەی قوربانی.
نادین مایینزا، جێگری سه‌رۆكی لیژنه‌ی ئه‌مریكی بۆ ئازادییه ئاینییه نێوده‌وڵه‌تییه‌كان لە کۆنگرەیەکی ڕۆژنامەوانیدا ڕایگەیاند، “ئه‌م‌ریكا داوای له توركیا كردووه به‌پێی نه‌خشه‌ڕێگایه‌ك ناوچه‌كانی رۆژئاوای كوردستان جێبهێڵێت”.
ئاماژەی بەوەشکردووە، ”له‌و ڕاپۆرته‌ی له‌لایه‌ن لیژنه‌كه‌یانه‌وه ئاماده‌یان كردووه، دەرکەوتووە توركیا له‌و شوێنانه‌ی داگیریكردوون به‌رامبه‌ر به پێكهاتە ئاینییه‌كانی ناوچه‌كه پێشێلكاری ئه‌نجامده‌دات، تاوانیش به‌رامبه‌ر به كریستیان و ئێزدی و كورد، به‌تایبه‌ت به‌رامبه‌ر به ژنان ئه‌نجامده‌دات”.
قسەکانی جێگری سه‌رۆكی لیژنه‌ی ئه‌مریكی بۆ ئازادییه ئاینییه‌کان دوای بۆردوومانێکی تورکیا بۆسەر کۆبانێ هات و وتی، “زۆر نیگه‌ران بووم به چه‌ند کاتژمێرێک دوای هاتنم هه‌واڵی ئه‌وه‌م پێگه‌یشت چه‌ند شوێنێكی كوبانێ ڕووبه‌ڕووی بۆمباران بوونه‌ته‌وه و هاوڵاتییه‌كی سیڤیل شه‌هیدبووه و 11 کەسی دیکەش برینداربوون، زۆریش به‌وه نیگه‌رانم منداڵێكی چوارساڵان قاچێكی له ده‌ستداوه”.
هاوکات عه‌بدولكه‌ریم عومه‌ر، هاوسه‌رۆكی فه‌رمانگه‌ی په‌یوه‌ندییه‌كانی ده‌ره‌وه‌ی به‌ڕێوه‌به‌رێتی خۆسه‌ر لە کۆنگرە ڕۆژنامەوانییەکەدا ڕایگەیاند، “له گفتوگۆكه‌ماندا چه‌ند بابه‌تێكمان باسكرد، به‌تایبه‌ت پێشێلكارییه‌كانی توركیا بەرامبەر به ناوچه‌كه و تێكدانی سه‌قامگیری تێیدا، به‌هه‌مان شێوه باسمان له كاریگه‌ریی داخستنی ده‌وازه‌كان له‌سه‌ر ئابوریی ناوچه‌كه كرد، كه بووه‌ته هۆی ئه‌وه‌ی ژینگه‌یه‌كی له‌بار بۆ گه‌ڕانه‌وه‌ی ڕێكخراوی داعش بخوڵقێنێت”.
