لە ڕاگەیەندراوێكدا سەرۆكی هەرێمی كوردستان سەرەكۆنەی ئەو “پەلامارە تیرۆریستییانە”ی كرد كە دەكرێنە سەر هێزە عێراقییەكان.
ئەمشەو دووشەممە 9ی تشرینی دووەم لە ڕاگەیەندراوێكدا نێچیرڤان بارزانی، سەرۆكی هەرێمی كوردستان ڕایگەیاند، “زۆر بە توندی ئەو پەلامارە تیرۆریستییە سەرکۆنە دەکەم کە دره‌نگانى شه‌وى ڕابردوو کرایە سەر بنکەیەکی هێزە ئەمنییەکانی عێراق لە ڕەزوانییە و بە داخەوە ژمارەیەک قوربانی له هێزه ئه‌منييه‌كان و خه‌ڵكى مه‌ده‌نى لێکەوتەوه”.
سەرۆكی هەرێمی كوردستان ئەوەشی خستوەتەڕوو، “هاوخەمى کەسوکاری قوربانییانم، هیوای زووچاکبوونەوە بۆ بریندارەکان دەخوازم”.
نێچیرڤان بارزانی ئاماژەی بەوەشكردووە، “ئەم هێرشانه دەیسەلمێنن كه تیرۆر ھەڕەشە و مەترسییەکی بەردەوامە و ژیان و ئارامیی هەموو لایەکمانی بە ئامانج گرتووە، بۆیە دەبێت هه‌موو لايه‌ك هاوكار و هه‌ماهه‌نگ بين و به یەکگرتوویی بەرەنگاری ببینەوە”.
