پارێزگاری دیالە دەڵێت، هەماهەنگی لەگەڵ هەرێمی كوردستان باشترین ڕێگەچارەیە بۆ لەناوبردنی پاشماوەی داعش لە پارێزگاكە.
موسەننا تەمیمی، پارێزگاری دیالە لە لێدوانێكی تەلەڤیزیۆنیدا ڕایگەیاند، سنووری جیاكەرەوەی نێوان هەرێمی كوردستان و ناوچەكانی تری عێراق چالاكیی داعشی تیادا بەدیدەكرێت، لەناوبردنی داعشیش نایەتەدی بەبێ هەماهەنگی لەگەڵ هێزی پێشمەرگە بەهۆی ئاشنابوونیان بە جوگرافیای ناوچەكە و بۆ ئاڵوگۆڕیی زانیاری.
وتیشی، “جوگرافیای ناوچەی حەمرین دژوارە و درێژدەبێتەوە بۆ سێ پارێزگا، ڕووداوەكەی ئەمدواییە لە شاخی حەمرین و دەریاچەی حەمرین ئامانج لێی دروستكردنی كەشێكە لەلایەن ڕێكخراوە تیرۆرستییەكەوە كە لە دیالە بوونی هەیە، لەكاتێكدا تەنها گروپی بچووكن”.
بەپێی وتەی تەمیمی توانای سنووردانان بۆ ئەو گروپانە هەیە و پێشتریش چەندین پرۆسەی سەربازی بۆ كۆنتڕۆڵكردنی زۆرینەی ناوچەكانی پارێزگاكە ئەنجامدراون، بەڵام دووپاتیكردەوە كە پێویستی بە خستنەگەڕی هەوڵی هەواڵگریی بەهێز هەیە.
