بەڕێوەبەرایەتیی بەرگریی شارستانیی سلێمانی ئاشکراکرد، بەیانیی ئەمڕۆ سێشەممە بەهۆی شۆرتی کارەباوە ماڵێک سوتاوە کە دوو هاوسەری بەتەمەنی تێدا ژیاوە و بەهۆیەوە پیاوەکە گیانیلەدەستداوە.
لەلێدوانێکدا بۆ تۆڕی میدیایی ئێستا ئاوات عەلی وتەبێژی بەڕێوەبەرایەتیی بەرگریی شارستانیی سلێمانی باسیلەوەکرد، ڕووداوەکە لەبەشێکی ماڵەکەدا بووە و هۆکارەکەی شۆرتی کارەبا بووە کەبووەتەهۆی ئاگرکەوتنەوە و سوتانی ماڵەکە.
بەپێی لێدوانی وتەبێژی بەرگریی شارستانی، لەو ڕووداوەدا خاوەنی ماڵەکە کە پیاوێکی تەمەن 80 ساڵ بووە بەناوی عەلی مەعروف بەکاریگەریی دوکەڵ و غازی ئاگرەکە خنکاوە و گیانیلەدەستداوە، خێزانەکەشی بەهۆی کاریگەریی زۆری دوکەڵ و غاز لەسەری گەیەنراوەتە نەخۆشخانە.
ئاوات عەلی وتیشی، زیانە مادییەکانی ئەو ڕووداوە بە پێنج ملیۆن دینار مەزەندە دەکرێت.
