یاریزانێکی ئۆکرانی بەهۆی بەکارهێنانی ڤیدیۆیەکی ڤلادیمێر پوتین سەرۆکی ڕوسیاوە، ژیانی کەوتووەتە مەترسییەوە و سەدان هەزار نامەی هەڕەشەی ئاراستەکراوە.
یاریزانێکی یانەی ئەمکار-ی ئۆکرانی بەناوی ئۆلیگ میچینکۆ لە پێگەی تایبەتی خۆی لە تۆڕی کۆمەڵایەتیی ئینستگرام، ڤیدیۆیەکی ڤلادیمێر پوتینی سەرۆکی ڕوسیای بڵاوکردووەتەوە، تیایدا پیرۆزبایی ساڵی نوێ لە هاوڕێ ڕوسییەکانی دەکات و دەڵێت، “هەموو ساڵێکتان بەخۆشی بێت براکانم”.
بەپێی سەرچاوە ڕوسییەکان، یاریزانی ناوبراو بەهۆی بڵاوکردنەوەی ئەو گرتە ڤیدیۆییەوە ڕووبەڕووی ڕەخنەی ڕێژەیەکی یەکجار زۆری دانیشتووانی ئۆکرانیا و هاونیشتمانییەکانی بووەتەوە، سەدان هەزار نامەی هەڕەشەئامێزی ئاراستەکراوە، تەنانەت ڕیپۆرتیش لە پەیجەکەی دراوە و بوونەتە هۆی داخستنی ئەکاونت و پەیجەکانی، لەبەرامبەردا یاریزانەکە داوای پاراستنی ماڵ و ژیانی لە کاربەدەستانی وڵاتەکەی کردووە.
لەئێستادا پەیوەندییەكانی نێوان مۆسكۆ و كیێڤ گرژە، كۆكردنەوەی هێز لەلایەن ڕوسیاوە لەسەر سنووری ئۆكرانیا نیگەرانیی كیێڤ و وڵاتانی ئەوروپا و ناتۆی لێكەوتووەتەوە، ترسیان هەیە ڕوسیا هێرش بكاتە سەر ئۆكرانیا.
