2020 بۆ کیمیچ کۆتاییهات

له‌ کۆتا ڕوبه‌وبوونه‌وه‌ی یانه‌ی بایرن میونشن به‌رانبه‌ر بوروسیا دۆرتمۆند که‌ به‌ بردنه‌وه‌ی سوورپۆشه‌کان به‌ ئه‌نجامی سێ گۆڵ به‌رانبه‌ر دوو کۆتاییهات، به‌هۆی به‌ریه‌ککه‌وتنێکه‌وه‌ له‌گه‌ل ئێرلینگ هالاندی هێرشبه‌ری نه‌رویجی، جۆشوا کیمیچ ئه‌ستێره‌ی هه‌ڵکشاوی یانه‌ی بایرن میونشن دووچاری پێکان هات و به‌ ئازارێکی زۆره‌وه‌ یاریگای به‌جێهێشت.

دوای ئه‌نجامدانی پشکنینی ورد له‌لایه‌ن ستافی پزیشکی بایرن میونشنه‌وه‌، ده‌رکه‌وت یاریزانه‌که‌ دووچاری لێکپچڕانی یه‌کێک له‌ به‌سته‌ره‌کانی ئه‌ژنۆی ڕاستی هاتووه‌ و پێویستی به‌ نه‌شته‌رگه‌ری خێرایه‌.

ڕۆژنامه‌ی بێلد سپۆرتی ئه‌ڵمانی ئاشکرایکردووه‌، ئه‌ستتێره‌‌که‌ی هه‌ڵبژارده‌ی ئه‌ڵمانیا و باڤاری به‌ سه‌رکه‌وتوویی نه‌شته‌رگه‌ری بۆ ئه‌نجامدراوه‌ و ماوه‌ی دوو مانگ له‌ سوڕی حه‌وانه‌وه‌ و چاره‌سه‌ردا ده‌بێت، واتا تاوه‌کو سه‌ره‌تاکانی مانگی کانونی دووه‌می 2021 دوورده‌که‌وێته‌وه‌ و به‌شداری هیچ ڕوبه‌ڕوبوونه‌وه‌یه‌کی بوندس لیگا و پاڵه‌وانێتیه‌ نیوده‌وڵه‌تییه‌کان ناکات.

کیمیچ له‌م وه‌رزه‌دا 11 ڕوبه‌ڕوبوونه‌وه‌ی به‌ درێسی یانه‌ی بایرن میونشن له‌ سه‌رجه‌م خول و پاڵه‌وانێتیه‌کان ئه‌نجامداوه‌، سێ گۆڵی تۆمارکردووه‌ و حه‌وت گۆڵی بۆ هێرشبه‌رانی یانه‌که‌ی ڕه‌خساندووه‌، له‌لایه‌ن هانزی فلیکی ڕاهێنه‌ره‌وه‌ وه‌ک یه‌کێک له‌ کۆڵه‌که‌کانی پێکهاته‌ی بایرن مامه‌ڵه‌ی له‌گه‌ڵدا ده‌کرێت.