کریستیانۆ ڕۆناڵدۆی پۆرتوگالی پێی وایە، یانەی مانچستەر یونایتد پرۆژەی درێژخایەنی نییە و نایەوێت لەو یانەیە بەردەوام بێت.
بەپێی زانیارییەکانی “مانچستەر ئیڤنینگ نیوز”، تووڕەیی کریستیانۆ لە بەڕێوەبەرانی مان یونایتد بەبێ هۆکار نییە، ئەمانەش گرنگترین هۆکارەکانن:
یەکەم: بە هیوا بووە سەروەرییەکانی ڕابردوو بگەڕێنێتەوە، بەڵام 35 خاڵ کەوتوونەتە دوای سیتی و هیچ چاکسازییان نەناوە.
دووەم: بەشداری نەکردنیان لە چامپیۆنزلیگ، لە کاتێکدا کریستیانۆ لە 19 وەرزی لەسەریەک لە خولە ئەوروپییەکە دانەبڕاوە.
سێیەم: تەمەنی 37 ساڵە و دەرفەتی ئەوە نییە وەرزێک چاوەڕوانی یانەیەکی ڕووخاو بکات، تاوەکو جارێکی دیکە خۆی بونیاد بنێتەوە.
چوارەم: لاوازی مان یونایتد لە مێرکاتۆ، لە کاتێکدا سیتی و لیڤەرپوڵ، هالاند و نونێز-یان کڕیوە و لە هەوڵدان بۆ گرێبەستی دیکە، ئیدارەی “ڕێد دێڤڵز” سەرقاڵی گواستنەوەی کریستیان ئێرکسنی دانیمارکییە، کە لە جامی نەتەوەکانی ئەوروپا تووشی جەڵتەی دڵ بوو.
پێنجەم: بڕیار دراوە مووچەی یاریزانان بە ڕێژەی لەسەددا 25 کەم بکرێتەوە، سەرەڕای ئەوەی کریس مووچەی هەفتانەی 480 هەزار پاوەندە، بەڵام پێی وایە ئەوەی ڕوو دەدات هەڵەی کارگێڕییە نەک یاریزانان.
