کەمی غاز لە سلێمانی ماوەی زیاتر لە مانگێکە بەردەوامە، هۆکارەکەشی دەگەڕێتەوە بۆئەوەی ئەو بڕە غازەی لە کێڵگەی کۆرمۆرەوە دەنێردرێت بۆ سلێمانی کەمترە لەبڕی پێویست بۆ پڕکردنەوەی خواستی هاوڵاتییانی شارەکە.
هاوڵاتییەک کە کێشەی دەستنەکەوتنی غازی هەبوو بە تۆڕی میدیایی ئێستای وت، “لەکاتژمێر 7:00ی بەیانییەوە وەستاوم و بتڵێک غازم بەرنەکەوتووە بیکڕم، ماوەی سێ ڕۆژە دێمە ئێرە و غازم دەستناکەوێت”
هەرچەندە نرخی غاز هەر وەک خۆیەتی و گۆڕانکاری بەسەردانەهاتووە کە 8 هەزار و 500 دینارە، بەڵام گرفتەکە لەکەمیی غاز و نەگەڕانی ئۆتۆمبێلەکانی فرۆشتنی غازە بەمەبەستی دابەشکردنی.
هاوڵاتییەکی دیکە بە تۆڕی نیدیایی ئێستای وت، “لەبەرئەوەی ئێستا ئۆتۆمبێلەکان ناگەڕێن بەگەڕەکەکاندا و غاز وەکو پێشتر نافرۆشن بۆیە ناچارین لەبەیانی زووەوە بێینە ئێرە بۆ گۆڕینی غاز”.
کەمی غاز دەگەڕێتەوە بۆئەوەی لەلایەن کێڵگەی کۆرمۆرەوە هێندەی ئەو بڕە غازە دەنێردرێت بۆ سلێمانی کە هاوتای وەرزی هاوینە بەڵام خواست لەسەر غاز لە وەرزی زستاندا زیاتر دەبێت بۆیە گرفت دروستبووە.
هەروەها بەشێکی غاز فرۆشەکان ئەو بڕە غازەی پێیاندەدرێت بۆئەوەی دابەشبکرێت بەڵام هەڵیدەگرن تاوەکو بەنرخێکی بەرز بیفرۆشێت.
پێشتر ئاوات محەمەد قائیمقامی سلێمانی بەتؤری میدیایی ئێستای ڕاگەیاند، کێشەی غاز کاتییە و لەماوەی چەند ڕۆژێکی داهاتوودا چارەسەردەبێت.
