ئەگەر لەو كەسانەیت كە حەز بە خواردنەوەی قاوەی تاڵ، یان چۆكلەیتی ڕەش دەكەیت، پێدەچێت ئەم حەزی “تاڵییە” پەیوەندیداربێت بەهۆكاری بۆماوەیی، وەك ئەوەی توێژەرێكی ئەمریكی دەیڵێت.
مارلین كۆرنیلیس، توێژەر و مامۆستا لە پزیشكی بەرگری لە زانكۆی نۆرس ویسترن لە چیكاگۆ ڕوونیدەكاتەوە، ئەوەی حەزی قاوەی ڕەشی بەبۆماوە بۆماوەتەوە “خۆشبەختە” بەهۆی ئەوەی ئەو خواردنەوەیە سوودی تەندروستیی هەیە.
پسپۆڕە ئەمریكییەكە دەڵێت، خواردنەوەی بڕێكی گونجاوی قاوەی ڕەش، بەواتای لەنێوان سێ بۆ پێنج كوپ لە ڕۆژێكدا، توانای كەمكردنەوەی مەترسی چەندین نەخۆشی نیشانداوە، لەنێویاندا “پاركینسۆن” و دڵەكوتێ و شەكرەی جۆری دووەم و چەند جۆرێكی شێرپەنجە.
توێژەرەكە هۆشداری ئەوە دەدات كە سوودمەندبوون لە سوودەكانی قاوە، لە بنەڕەتدا پەیوەندیدارە بە تێكەڵنەكردنی لەگەڵ ماددەی زیانبەخشی وەك شەكر، شیر یان تام، كە دەبێتەهۆی زیادبوونی یەكەی گەرمۆكە (كالۆری).
دەشڵێت، ئەو كەسەی دەیەوێت قاوە بخواتەوە، پێویستە كوپێك قاوەی ڕەش هەڵبژێرێت، لەبەرئەوەی باشترینە لەڕووی تەندروستییەوە، هەروەها كاریگەرییەكەشی زۆر جیاوازە لە قاوەیەك بە شیرەوە.
ڕوونیشیدەكاتەوە، قاوەی ڕەش بەشێوەی سروشتی یەكەی گەرمۆكەی تیانییە، لەكاتێكدا یەكەی گەرمۆكە لە قاوە لەگەڵ شیردا دەگاتە سەدان.
لە توێژینەوەیەكی پێشوودا كە كۆرنیلیس لەگەڵ تیمە زانستییەكەی ئەنجامیداوە، دەركەوت كە هۆكاری بۆماوەیی وادەكات هەندێك كەس حەز بە خواردنەوەی قاوەی ڕەش بكەن، لەكاتێكدا هەندێكی دیكە حەزی پێناكەن بەهۆی ئەوەی تامەكەی تاڵە لای ئەوان.
