شۆفێری پێشووی فۆرمولا 1 و تیمی ڕێدبوڵ، مارک ویبەر دووپاتیدەکاتەوە، ماکس ڤێرشتاپن شۆفێرێکی دیاردەیە و پێویستە ڕێزی زیاتر لە تواناکانی بگیرێت.
ماکس ڤێرشتاپن لەم وەرزەدا لەگەڵ تیمی ڕێدبوڵ کێبڕکێیەکی بەهێزی لویس هامیڵتۆنی شۆفێری بەریتانی تیمی مێرسیدسی کرد، سەرەڕای ئەوەی شۆفێری دووەم ئوتۆمبێلێکی خێراتر و بەهیزتری پێبوو، لە کۆتا پێشبڕکێدا شۆفێرە هۆڵەندییەکە پلەی یەکەمی بەدەستهێنا و ناسناوی پاڵەوانی جیهانی بەدەستهێنا.
لەو بارەیەوە مارک ویبەر، شۆفێری پێشووی بواری فۆرمولا 1 بە “کەناڵ 4″ی ڕاگەیاندووە، “ئەو بەرەوپێشچوونە زۆرەی بەو تەمەنە کەمەوە ڤێرشتاپن کردوویەتی زۆر شتێکی گەورەیە، متمانەی لەوپەڕی ئاست بەرزیدا بوو، مامەڵەکردن و شۆفێریکردنی ئوتۆمبێلی فۆرمولا 1 بابەتێکی ئاسان نییە و بە ئاسانیش ناتوانیت لەگەڵیدا خۆتبگونجێنیت، بەڵام ئەو توانی وەرزێکی مێژوویی بەڕیبکات، ئەم جۆرە شۆفێرانە بە 10 ساڵ جارێک دەردەکەون، پێویستە جیهانی فۆرمولا 1 لە ئامێزی بگرێت”.
لێدوانەکانی ویبەر هاوکاتە لەگەڵ بەرهەڵستیکردنی تیمی ڕێدبوڵ، بەتایبەت ماکس ڤێرشتاپن لەلایەن هەندێک لە بەرپرسانی فۆرمولا 1ــەوە، چونکە هەندێک لەوانە پێیانوابوو هامیڵتۆن بەتواناترە و شایستەی ئەوەبووە ناسناوی پاڵەوانی وەرز بچنێتەوە، تەنانەت تیمی مێرسیدس بڕیاربوو تانە لە ئەنجامی کۆتا پێشبڕکێ بدەن، بەڵام دواتر هەنگاوەکانیان هەڵوەشاندەوە.
