هاوپه‌یمانیی نێوده‌وڵه‌تی دژى داعش جه‌ختده‌كاته‌وه، له ڕۆژی نۆی ئه‌م مانگه‌وه هیچ هێزێكی شه‌ڕكه‌ری هاوپه‌یمانێتییه‌كه‌یان و ئه‌مریكا له عێراق نه‌ماون.
ئاژانسی هه‌واڵی عێراقی له زاری به‌رپرسانی هاوپه‌یمانیی نێوده‌وڵتی دژى داعش گواستیه‌وه، “به‌پێی ئه‌و خشته كاتییه‌ی له گفتوگۆكانی نێوان ئه‌مریكا و عێراق له مانگی حوزه‌یران دیاریمان كردبوو، پابه‌ندبوونی خۆمان بە جێبه‌جێكردنی به‌ڵێنه‌كه‌مان بردووه‌ته‌سه‌ر”.
بۆیە دووپاتیكردووەتەوە، له نۆی ئه‌م مانگه‌وه، هیچ هێزێكی شه‌ڕكه‌ری ئه‌مریكا و هاوپه‌یمانێتییه‌كه‌یان له عێراق نه‌ماون.
به‌وته‌ى ئه‌و به‌رپرسه‌ى هاوپه‌یمانیی نێوده‌وڵه‌تى، ده‌كرا زووتریش له عێراق بكشێنه‌وه، ”به‌هۆی ئه‌و پێشكه‌وتنه گه‌وره‌یه‌ی له هێزه ئه‌منییه عێراقییه‌كان به‌دیكراوه، له‌وانه‌ش هێزه‌كانی پیشمه‌رگه، كه ده‌توانن سه‌ركردایه‌تی شه‌ڕی دژی داعش بكه‌ن”.
ده‌رباره‌ى مانه‌وه‌ى ئه‌و هێزانه‌ى هاوپەیمانێتییەكەش كە تا ئێستا نەكشاونەتەوە، ڕوونیكردووه‌ته‌وه، ئه‌ركی سه‌ره‌كییان پیشكه‌شكردنی ڕاوێژ و هاوكارییه بۆ هێزه ئه‌منییه‌كانی عێراق، له‌پێناو به‌رده‌وامبوونیان له شكستپێهێنانی داعشدا.
