دەزگای لوتکە بۆ کاروباری پەنابەران ڕایگەیاند، بڕیاربوو بەرەبەیانی سبەی تەرمی قوربانییانی نۆکەندی ئینگلیز بگەڕێندرێنەوە هەرێمی کوردستان، بەڵام گەشتەکە دواخراوە.
ئاری جەلال، سەرۆکی دەزگای لوتکە بۆ كاروباری ئاوارە و پەنابەران بە تۆڕی میدیایی ئێستای ڕایگەیاند، ” بەهۆکاری کێشەیەک ئاگادارکراوینەتەوە کە گەشتی ئەو فڕۆکەیەی تەرمی کۆچبەرانی کوردی تێدایە، لە ئیستەنبولەوە بۆ هەولێر دوادەکەوێت “.
بڕیاربوو تەرمی 16 کۆچبەری کورد لە فەڕەنساوە بۆ ئیستەنبول و لەوێەوە بۆ هەولێر بگەڕێندرێتەوە و بەرەبەیانی ڕۆژی هەینی کاتژمێر 3:35 خولەک بگەنەوە هەرێمی کوردستان، بەڵام گەشتەکە دواخراوە.
پێشتر جوتیار عادل، وتەبێژی حكومەتی هەرێم ڕایگەیاندبوو، کاژمێر 3:35 خولەكی بەرەبەیانی ڕۆژی ھەینی 24ی كانونی یەكەم تەرمی ئەو 16 قوربانییەی لە ئاوی نێوان فەرەنسا و بەریتانیا لە 24ی تشرینی دووەم بەهۆی نوقمبوونی بەلەمەکەیانەوە گیانیان لەدەستدا لە ڕێگەی فڕۆکەخانەی نێودەوڵەتی هەولێرەوە دەگەڕێندرێنەوە هەرێمی کوردستان.
