هێزە ئەمنییەكان چارەسازێكی بریندارانی داعش و چوار یاریدەدەریان دەستگیركرد.
بەپێی ڕاگەیەندراوی شانەی ڕاگەیاندنی ئەمنیی عێراق كە ئەمڕۆ پینجشەممە بڵاویكردووەتەوە، لە كەركوك پێنج داعش دەستگیركراون، یەكێكیان پیشەی چارەسەركردنی بریندارانی داعش بووە كە پشتیوانیی لۆجستیشی بۆدەستەبەركردوون.
ڕاگەیەندراوەكە دەڵێت، هەڵمەتی دەستگیركردنەكە لەلایەن ئاژانسی هەواڵگری و لێكۆڵینەوەی فیدراڵییەوە بەرپاكراوە، چارەسازەكە كارمەندی وەزارەتی تەندروستییە و پیشەكەی بەكارهێناوە بۆ بردنی دەرمان و كەرەستەی پزیشكی بۆ چەكدارانی داعش و چارەسەركردنی بریندارەكانیان، سەرباری ئەوانەش لەڕووی لۆجستییەوە هاوكاریی ڕێكخراوەكەی كردووە.
شانەی ڕاگەیاندنی ئەمنیی عێراق ڕایگەیاندووە، چوار چەكداری تری داعش دەستگیركراون كە یاریدەدەری ئەو كەسە بوون و چەندین تاوان و كردەوەی تیرۆریستییان لەدژی هاوڵاتییان و هێزە ئەمنییەكان ئەنجامداوە.
