شاندێكی چێوەی هەماهەنگیی شیعەكان لە هەولێر سەردانی مەكتەبی سیاسیی یەكێتیی كرد، پێكهێنانی حكومەتی نوێی عێراقیان تاوتوێكرد، یەکێتی جەختی لەسەر حکومەتێک كردووەتەوە، کە خزمەتگوزار بێت و چاکسازیی ڕاستەقینە ئەنجامبدات.
بەپێی ڕاگەیەندراوی كۆبوونەوەكە، هەوڵ و هەنگاوەکانی لایەنە سیاسییەکان بۆ پێکهێنانی حکومەتى نوێى عێراق دەچنە قۆناغی پراکتیکیەوە، لەو میانەیەشدا ئەمڕۆ لەشارى هەولێر، قوباد تاڵەبانی و عیماد ئەحمەد، ئەندامانی مەکتەبی سیاسیی یەكێتی، بەیاوەریی شاندێكی باڵای حزبەكە، پێشوازییان کرد لە شاندێكی باڵاى چێوەى هەماهەنگی بەسەرۆکایەتی نورى مالکی.
لەکۆبوونەوەکەدا گفتوگۆکرا لەبارەى دوایین پەرەسەندنە سیاسییەکان و قۆناغی دوای هەڵبژاردنەکان و هەوڵەکانی پێکهێنانی حکومەتى نوێى عێراق، لەوبارەیەوە شاندی میوان، بۆچوونی هێزەکانی چێوەى هەماهەنگیان خستەڕوو لەپێناو بەدیهێنانی هاوسەنگیی سیاسی، کە پێویستە بۆ زامنکردنی گێڕانەوەى سەقامگیریی سیستمی سیاسی.
هەردوولا پێویستیی بەردەوامبوون لەسەر هەوڵەکانی نزیککردنەوەی بۆچوونی لایەنە سیاسییەکانیان دووپاتکردەوە لەپێناو بەدیهێنانی بەرژەوەندییە گشتییەکان، کە ئەوەش بە حکومەتێکی خزمەتگوزار دەکرێت کە داخوازیی ھاوڵاتیان بە‌دیبھێنێت، هاوکات جەختیش لەسەر شەراکەت و هاوسەنگی لە پرۆسەى حوکمڕانیدا کرایەوە.
لە کۆبونەوەکەدا یەکێتی بە شاندی میوانی ڕاگەیاند، “ئێمە وەکو یەکێتیی نیشتمانیی کوردستان لەسەر ڕێبازی سەرۆک مام جەلال بەردەوامین و لەگەڵ چارەسەرکردنی گرفتەکانین لەڕێی گفتوگۆ و یەکخستنی ڕیزەکان لەپێناو گەلانی عێراق بەگشتی”.
باسیان لەوەشکردووە، شاندێكی یەکێتی دەچێتە بەغداد بە مەبەستی گفتوگۆکردن لەگەڵ لایەنە سیاسییەکان لەبارەی پێکهێنانی حکومەتێک، کە توانای خزمەتکردنی هاوڵاتییانی هەبێت و هەروەها بتوانێت ڕووبەڕووی مەترسییەکانی داعش ببێتەوە، لەگەڵ بنبڕکردنی گەندەڵییەکان و چاکسازیی ڕاستەقینە ئەنجامبدات.
