وەزارەتی تەندروستیی عێراق دەڵێت، ئەمڕۆ ڕێژەی تووشبوون بە كۆرۆنا بەرزبووەتەوە و تەنها لە ماوەی 24 كاتژمێردا 364 كەس تووشی كۆڤید-19 بوون.
بەپێی ئاماری وەزارەتی تەندروستیی عێراق كە ئێوارەی ئەمڕۆ دووشەممە ڕاگەیەندراوە، لە ماوەی 24 كاتژمێری ڕابردوودا 364 كەس تووشی كۆرۆنا بوون، 547 كەسیش پەتاكەیان تێپەڕاندووە و ئەوانەی بە كۆرۆنا مردوون ژمارەیان 11 كەسە.
زۆرترین حاڵەتەكانی تووشبوون بە كۆرۆنا لە كەركوك تۆماركراون كە تەنها لە یەك ڕۆژدا 77 كەس لەو پارێزگایە تووشی كۆرۆنا بوون و زۆرترین مردنیش لە سلێمانی بووە كە سێ تووشبووی كۆرۆنا بوون.
بەپێی ڕاگەیەندراوی ئاماری وەزارەتی تەندروستیی عێراق، ئەمڕۆ دووشەممە 82158 كەس ڤاكسینی دژەكۆرۆنایان وەرگرتوون.
