سەرۆكی هەڵبژێردراوی ئەمریكا جۆ بایدن ڕایگەیاند، بردنەوەیەكی گەورەی تۆماركردووە و كاردەكات بۆ ئەوەی “گەورەیی و قورسایی” بۆ ئەمریكا بگەرێنێتەوە.
شەوی ڕابردوو شەممە 7ی تشرینی دووەم بەكاتی هەرێمی كوردستان، جۆ بایدن، سەرۆكی هەڵبژێردراوی ئەمریكا ڕایگەیاند، “بردنەوەیەكی گەورەمان تۆماركرد، ژمارەی 74 ملیۆن بێ پێشینەیە و هیچ كاندیدێكی سەرۆكایەتی ئەو دەنگەی بەدەستنەهێناوە پێشتر”.
بایدن ئەوەشی خستوەتەڕوو، “كاندید كرام بۆ ئەوەی جارێكی دیكە گەورەیی و قورسایی و ڕێز بۆ ئەمریكا بگەڕێنمەوە لەنێو وڵاتانی جیهان”.
سەرۆكی هەڵبژێردراوی ئەمریكا ئاماژەی بەوەشكردووە، “لە بێئومێدبوون لە دەنگدان بۆ ترەمپ تێدەگەم، بۆیە دەڵێم لای من ویلایەتی شین و سوور بوونی نییە، من پەیمان دەدەم سەرۆكی هەموو ئەمریكییەكان بم بە سەرجەم جیاوازییەكانەوە”.
بایدن ڕووی وتەكانی كردووەتە لایەنگرانی ترەمپ و دەڵێت، “لێمانگەڕێن چانس بە یەكتر بدەین، كێبڕكێكارەكانمان دووژمنمان نین ئەوانیش ئەمریكین، لێگەڕێن لە بەرژوەندیی وڵاتەكەمان پێكەوە كاربكەین”.
لەبارەی كۆرۆناوە بایدن بەڵێنی ئەوەی داوە، ڕۆژی دووشەممەی داهاتوو كۆمەڵێك لە ڕاوێژكار و زانا ڕابسپێرێت بەمەبەستی دانانی پلانێك بۆ ڕوبەڕوبوونەوەی پەتای كۆرۆنا.
