بەشێک لە مامۆستایانی زانکۆکانی سلێمانی و ڕاپەڕین بەهۆی دواکەوتنی مووچەکانیان و دەستپێکردنەوەی پلەبەرزکردنەوە ناڕەزاییەتییان دەستپێکردووە.
کەمێک بەرلەئێستا بەشێک لە مامۆستایان و خوێندکارانی زانکۆی سلێمانی لەبەردەم زانکۆکە گردبوونەوەیان ئەنجامدا، داوای دابەشکردنی مووچەکانیان و دەستپێکردنەوەی پلەبەرزکردنەوە دەکەن.
یەکێک لە فەرمانبەرانی بەشداربووی گردبوونەوەکە ڕایگەیاند، داوای مووچەی مانگی 12ی دەکەین کە مافی خۆمانە، جگەلەوەش پلە بەرزکردنەوە چەند ساڵێکە ڕاگیراوە و داوادەکەین دەستپێبکاتەوە.
بەشداربووانی گردبوونەوەکە دەڵێن، ئەگەر هەموو مانگێکیش بەبێ لێبڕین مووچەمان پێبدرێت هێشتا ڕاگرتنی پلەبەرزکردنەوەکانمان جۆرێکە لە لێبڕین.
لەلایەکی دیکەوە لە زانکۆی ڕاپەڕین ماوەی هەشت ڕۆژە فەرمانبەران بایکۆتی دەوامیان کردووە و داوای دابەشکردنی مووچەی مانگی دوانزە دەکەن لەکاتی خۆیدا.
