پارێزگای سلێمانی سەبارەت بە ئامادەکارییەکان بۆ ڕوودانی لافاو دڵنیایی دەداتە هاوڵاتییان

جێگری پارێزگاری سلێمانی ئاشکرایکرد تیمەکانیان لەو ناوچە و گەڕەکانەی مەترسیی لافاویان لەسەرە ئامادەکاریی تەواویان کردووە بۆ ئەگەری ڕوودانی لافاو و جەختدەکاتەوە تیمە فریاگوزارییەکان لەئەرکدان.

لەڕاگەیەندراوێکدا لەیلا عومەر عەلی جێگری پارێزگاری سلێمانی ئاشکرایکرد، شارەوانیی سلێمانی لە ڕێگەی چەند تیمێکەوە کە دابەشبوون بەسەر چەند زۆنێکی شاری سلێمانیدا وە بەتایبەت ئەو ناوچە و گەڕەکانەی مەترسیی لافاویان لەسەربووە، ھەستاون بە پاککردنەوەی ئاوەڕۆ و مەنھۆڵەکان و ئامادەکاریی پێویستییان کردووە بۆ وەرزی باران.

ئاماژەی بەوەشکردووە، ئەو ئامادەکارییانە لــەژێر ڕۆشنایی ئاگادارکردنەوە و ڕاگەیاندنی فەرمانگەی کەشناسی سەبارەت بە پێشبینیی ڕوودانــی لافـــاو و حاڵەتی نەخوازراو ئەنجامدراون.

بەپێی جێگری پارێزگاری سلێمانی، سەرجەم تیمەکانی فریاگوزاری خێرا لە سەرجەم قائیمقامییەتەکانی سەر بە پارێزگای سلێمانی لە ئەرکدان و ئامادەکاریی تەواویان کردووە لە ئەگەری دروست بوونی ھەر ڕووداو و لافاوێک کە ببێتە ھۆی زیان گەیاندن بە ھاوڵاتیان.

هەروەها تیمی سەر بە بەڕێوەبەرایەتیی کۆچ و کۆچبەران و وەڵامدانەوەی قەیرانەکان (DMCR) لە پارێزگای سلێمانی خراوەتە حاڵەتی ئامادەباشییەوە و لەسەر ھێڵن بۆ مەبەستی بە هاناوەچوونی لێقەوماوان، کە ئۆتۆمبێلی تایبەتی بەهاناوەچوون و ستافی ڕاهێنراو و تایبەتیان ھەیە.

لە ڕاگەیەندراوەکەدا هاتووە، سەرجەم فەرمانگە پەیوەندیدارەکان لەئامادەباشی و حاڵەتی ئێشکگریدان بۆ بەهاناوەچوونی هەر حاڵەتێکی نەخوازراو.

داواش لە ھاوڵاتییان دەکەن بەھۆی بوونی ھەورە بروسکەیەکی زۆر وە بۆ پاراستنی ژیانیان لە ماڵەکانیان بمێننەوە، هەروەها لە ئەگەری دروست بوونی لافاو ھاوکار و ھەماھەنگی تیمەکانمان بن.

بابەتی پێشتر

دیالە.. داعش هێرشی بۆسەر خاڵێکی هێزە عێراقییەکان ئەنجامدا

بابەتی دواتر

کۆشکی سپی: ئامادەین بۆ تاوتوێکردنی بابەتە ئەمنییەکان لەگەڵ ڕوسیا

بابەتی پەیوەندیدار
Total
12
Share