پارتی دەروازەی پێشخاپووری بەڕووی ڕۆژئاوای كوردستاندا داخست، دوای ئەوەی دوێنێ گرژی و شەڕەبەرد لەنێوان ژمارەیەك گەنجی ڕۆژئاوا و هێزەكانی دەروازەی سنووریی پێشخاپوور دروستبوو.
دوێنێ لە خاڵی سنووریی پێشخاپوور شەڕەبەرد و پێكداهەڵپژان لەنێوان ژمارەیەك گەنجی ڕۆژئاوای كوردستان و هێزەكانی پارتی لە خاڵە سنوورییەكە دروستبوو، میدیاكانی پەكەكە باسیان لە برینداربوونی چەند گەنجێك كرد.
ماوەیەكە ژمارەیەك لە كەسوكاری گەریلا شەهیدكراوەكان، كە لە شەڕ و پێكدادان لەگەڵ توركیا، یان لەلایەن هێزەكانی پارتی دیموكراتی كوردستانەوە شەهیدكراون، لە دەروازەی سنووریی سێمێلكان و دەیانەوێت بێنە هەرێمی كوردستانەوە، بەڵام پارتی ڕێگەیان پێنادات.
كەسوكاری گەریلا شەهیدەكان داوای وەرگرتنەوەی تەرم و دیاریكردنی چارەنووسی چەند گەریلایەكی دیكە دەكەن، زیاتر لە جارێك داواكارییان لە پارتی هەبووە، بەڵام هیچ وەڵامێكیان وەرنەگرتووەتەوە.
بۆیە دوێنێ و دوای چاوەڕوانییەكی زۆر، گرژی و ئاڵۆزی و شەڕەبەرد دروستبوو.
دەروازەی پێشخاپوور، كە لە دیوی ڕۆژئاوای كوردستانەوە سێمێلکای پێدەگوترێت، زیاتر لە جارێك بەڕووی ڕۆژئاوادا داخراوە، بەردەوام ئەو هەنگاوە نیگەرانیی كوردانی ڕۆژئاوای بەدواداهاتووە.
