دەزگای لوتكە ناوی ئەو كۆچبەرە كوردانەی بڵاوكردەوە كە بەهۆی نقومبوونی بەلەمەكەی كەنداوی ئینگلیز گیانیان لەدەستداوە یاخود بێسەروشوێن بوون.
دەزگای لوتكە بۆ كاروباری ئاوارە و پەنابەران ناوی 17 كۆچبەری بڵاوكردەوە كە لە ڕووداوەكەی 24ی تشرینی دووەمی ڕابردوو لە ئاوەكانی نێوان فەرەنسا و بەریتانیا خنكاون لەگەڵ دوو كۆچبەر كە بە بێسەروشوێنی ماونەتەوە.
پێشتر ئاری جەلال، سەرۆکی دەزگای لوتکە بە تۆڕی میدیایی ئێستای ڕایگەیاند، لەهەوڵی بەردەوامدان بۆ یەکلاییکردنەوەی ناسنامەی سەرجەم ئەو کۆچبەرانەی لە بەلەمەکەی فەرەنسا خنکان و تائێستاش لەو ژمارەیەی ناسنامەیان ئاشکراکراوە 17 کۆچبەریان کوردن، 16یان خەڵکی باشووری کوردستانن و ئەوی تریان خەڵکی ڕۆژهەڵاتە.
بەپێی سەرۆکی دەزگای لوتکە، ژمارەیەک لەوانەی ناسنامەکانیان یەکلاییکراوەتەوە تەرمەکانیان گەڕێنراونەتەوە و کار بۆ ئەوەشدەکەن پێش سەری ساڵی نوێ تەرمی ئەوانی دیکەش بهێنرێتەوە.
