ئەمڕۆ شاندێكی ئەمنیی عێراق گەیشتە مەخمور، لەگەڵ جەبار یاوەر ئەمینداری گشتیی وەزارەتی پێشمەرگە و بەشێك لە فەرماندەكانی پێشمەرگە كۆدەبنەوە.
میدیا عێراقییەكان سەردانی شاندەكە و ئەندامەكانیان ئاشكراكرد، بریتین لە جێگری فەرماندەی ئۆپەراسیۆنە هاوبەشەكان، یاریدەدەری سەرۆك ئەركانی سوپا و هەروەها فەرماندەی هێزە وشكانییەكان.
كۆبوونەوەكە بۆ تاوتوێكردنی پتەوتركردنی ئەو هەماهەنگییانەن كە لە ناوچە كێشەلەسەرەكان و ناوچەكانی بۆشایی ئەمنی، دوای هەڵكشانی هەڕەشەكانی داعش، لەو ناوچانە لەنێوان پێشمەرگە و سوپا هاتوونەتە ئاراوە، لەو نێوەندەشدا قسە هەیە لەبارەی پێكهێنانی لیوای هاوبەش لە نێوان هەردوولا.
ماوەیەكە لە ناوچەكانی نێوان پێشمەرگە و سوپای عێراق، جموجوڵ و هێرشەكانی داعش زیاتربوون و هێرشدەكەنە سەر هێزەكانی پێشمەرگە و هەروەها هێزە فیدراڵییەكان، بۆیە هەولێر و بەغداد چاویان لە هەماهەنگیی زیاترە بۆ پڕكردنەوەی بۆشاییە ئەمنییەكان.
