هێزی پێشمەرگەی كوردستان و هێزەكانی عێراق ئۆپەراسیۆنێكی تریان بە هاوبەشی دەستپێكرد بۆ لەناوبردنی تیرۆریستانی داعش لە خۆرهەڵاتی كەركوك.
شانەی ڕاگەیاندنی ئەمنیی عێراق ئەمڕۆ چوارشەممە بڵاویكردەوە، “بە ئامانجی وشككردنی سەرچاوەكانی تیرۆر و ڕاوەدوونانی چەکدارانی داعش و پاككردنەوەی ناوچەكان، هێزەكانی بارەگای پێشكەوتووی فەرماندەیی ئۆپەراسیۆنە هاوبەشەكانی كەركوك و هەردوو میحوەری سێ و چواری پێشمەرگە و دژەتیرۆر، ئۆپەراسیۆنێكی ئەمنیی هاوبەشیان لە خۆرهەڵاتی كەركوك بەرپاكرد”.
شانەی ڕاگەیاندنی ئەمنیی عێراق ئاماژە بۆ ئەوە دەكات كە دواتر زانیاریی زیاتر لەبارەی ئەو ئۆپەراسیۆنە هاوبەشەوە بڵاودەكاتەوە.
هەر ئەمڕۆ پێشمه‌رگه و سوپاى عێراق لە زنجیرە چیاکانی کفری و خورماتوو ئۆپەراسیۆنێكی هاوبەشیان دەستپێکرد بۆ دوورخستنەوەی مەترسییەکانی تیرۆریستانی داعش و لەناوبردنی مۆڵگەکانی تیرۆریستان لەو ناوچانەدا.
