قائیمقامییەتی سلێمانی دەستیبەسەر 42 تۆن ئارددا گرتووە، کە بەناوی باری مۆزەوە ویستراوە بنێردرێتە دەرەوە.
لە ڕاگەیەندراوێکدا قائیمقامیەتی سلێمانی بڵاویکردەوە، هێزەکانی ئاسایشی پارێزگای سلێمانی دەستیان بەسەر دوو بارهەڵگر ئارددا گرتووە، کە بڕی 42 تۆن ئاردیان پێبووە، خاوەنەکانیان بەنیازی بردنەدەرەوەی بوون، لەکاتێکدا بۆ ڕێگریكردن له به‌رزبوونه‌وه‌ی نرخی ئارد و نان و سه‌مون، بردنه‌ده‌ره‌وه‌ی ئاردی بەشەخۆراك بۆ ده‌ره‌وه‌ی پارێزگای سلێمانی به‌هه‌موو شێوه‌یه‌ك قه‌ده‌غه كراوه.
قائیمقامیەتی سلێمانی ئاشكرایكردووە، له‌م هه‌فته‌یه‌دا دوو بارهەڵگر، کە بڕی 25 تۆن و 17 تۆن ئاردی بەشەخۆراكیان باركردبوو، به‌نیازبوون به‌ناوی باری مۆزه‌وه بیبەنە ده‌ره‌وه‌ی سلێمانی، یەکێکیان له بازگه‌ی تاسڵوجه و ئەوی دیکەیان لە ناوچه‌یه‌كی نزیك بازگه‌ی كه‌ڵه‌وانان ده‌ستیان به‌سه‌ردا گیراوه.
سه‌ردار ساڵح ئه‌ندامی لیژنه‌ی باڵای لیژنه هاوبه‌شه‌كانی قائیمقامیه‌تی سلێمانی لەبارەی ئەو ڕێکارانەی بەرامبەر ئەو کەسانە دەگیرێتەبەر ڕایگەیاند، به چاودێریی لیژنه‌ی نانه‌واخانه‌كان ئه‌و بڕه ئارده‌ی ده‌ستیبه‌سه‌ردا گیراوه به‌شێوه‌یه‌كی ئاشكرا له بازاڕدا ده‌فرۆشرێت و پاره‌كه‌ی ده‌گه‌ڕێنرێته‌وه بۆ خاوه‌نه‌كه‌ی، له‌هه‌مان كاتدا ڕێكاری یاسایی له‌گه‌ڵ خاوه‌نه‌كه‌ی ده‌گیرێته‌به‌ر و بەبڕێك پاره‌ش سزاده‌درێت.
وتیشی، به بڕیاری قائیمقامی سلێمانی ڕێگه‌نادرێت به‌هیچ جۆرێك ئاردی بەشەخۆراك ببرێته ده‌ره‌وه‌ی پارێزگای سلێمانی، ئه‌وه‌ش له‌پێناو ڕێگریكردن له به‌رزبوونه‌وه‌ی نرخی ئارد، كه به‌هۆیه‌وه نرخی نان و سه‌مون به‌رزده‌بێته‌وه.
