ئەمشەو گەڕی شەشەم و كۆتایی قۆناغی كۆمەڵەكانی خولی یانە پاڵەوانەكانی ئەوروپا بەڕێوەدەچێت و چەند یارییەكی بەهێز ئەنجام دەدرێن.
كاتژمێر 8:45 خولەك دوو یاریی دەكرێن، پاریس سان جێرمانی فەرەنسی و كلۆپ برۆجی بەلجیكی ڕوبەڕووی یەك دەبنەوە، یارییەكە لە پارك دو فرانس بەڕێوەدەچێت.
مانچستەر سیتی-ی ئینگلیزیش دەبێتە میوانی لایبزیك-ی ئەڵمانی.
هەردوو یانەی مانچستەر سیتی و پاریس سان جێرمان بە پلەكانی یەكەم و دووەم سەركەوتنیان بۆ قۆناغی شازدە مسۆگەركردووە.
كاتژمێر 11:00 چەند یارییەكی تر بەڕێوەدەچن، پۆرتۆ لە پۆرتوگال میوانداریی ئەتلەتیكۆ مەدرید دەكات.
میلانی ئیتاڵی-ش ڕووبەڕووی لیڤەرپوڵ دەبێتەوە.
میلان بۆ گەیشتن بە قۆناغی شازدە، پێویستی بە بردنەوەیە لە لیڤەرپوڵ و دەبێت یارییەكەی تریش بە بردنەوەی ئەتلەتیكۆ مەدرید، یاخود یەكسانبوون كۆتایی بێت.
ئەتلەتیكۆش بە مەرجێك دەگاتە قۆناغی شازدە، بردنەوە بەسەر پۆرتۆ بەدەستبهێنێت و یارییەكەی تریش بە شكستی میلان یاخود بە یەكسانبوون كۆتایی بێت.
لە یارییەكی تردا و لەهەمان كاتدا ڕیاڵ مەدریدی ئیسپانی لە یاریگای خۆی میوانداریی ئینتەر میلانی ئیتاڵی دەكات.
هەردوو یانەكە گەیشتونەتە قۆناغی شازدە، بەڵام هەردووكیان شەڕی ئەوە دەكەن بە یەكەمی كۆمەڵەكەیان سەركەوتن بۆ قۆناغی داهاتوو بەدەستبهێنن.
ڕیاڵ مەدرید 12 خاڵی هەیە و پێشەنگە، بە بردنەوە و یەكسانبوون بە پلەی یەكەمی دەگاتە قۆناغی شازدە، ئینتەریش تەنها بە بردنەوە پلەی یەكەم دەگرێت.
یارییەكانی ئەمڕۆی چامپیۆنز لیگ
پاریس سانجێرمان – كلۆب برۆج 8:45
لایبزیگ – مانچستەر سیتی 8:45
بروسیا دۆرتمۆند – بیشكتاش 11:00
ئەیاكس – سپۆرتینگ لیشبۆنە 11:00
پۆرتۆ – ئەتلەتیكۆمەدرید 11:00
میلان – لیڤەرپوڵ 11:00
ڕیاڵ مەدرید – ئینتەرمیلان 11:00
شاختار دۆنیستیك – شیریف تراسپۆل 11:00
