شەوی ڕابردوو بە ئەنقەست بۆیلەری بەشە ناوخۆییەكانی زانكۆی سلێمانی كوژێنراوەتەوە، ئەو كەسەی كارەكەی كردووە كارەكانی ڕاگیراوە و لیژنەی لەسەر گیراوە.
سەرچاوەیەك لە سەرۆكایەتیی زانكۆی سلێمانییەوە بە تۆڕی میدیایی ئێستای ڕاگەیاند، شەوی ڕابردوو كەسێك بە ئەنقەست بۆیلەری بەشە ناوخۆییەكانی كامپی نوێی زانكۆی سلێمانی كوژاندووەتەوە، مەبەستی بووە ناڕەزایەتیی خوێندكارانی لێبكەوێتەوە.
ئاشكراشیكرد، ئەو كەسەی بەئەنقەست كارەكەی كردووە، لیژنەی لەسەرگیراوە و لێكۆڵینەوە لەبارەی پرسەكەوە دەكرێت، كارەكانیشی ڕاگیراوە.
كوژاندنەوەی بە ئەنقەستی بۆیلەری بەشە ناوخۆییەكانی زانكۆی سلێمانی لەكاتێكدایە، دوێنێ بافڵ جەلال تاڵەبانی لەگەڵ 121 خوێندكار كۆبووەوە، كە نوێنەرایەتیی خوێندكارانی زانكۆ و پەیمانگاكانی سلێمانی، هەڵەبجە، كەركوك و چەند شارێكی دیكەیان دەكرد.
بەڵێندراوە داواكارییەكانی خوێندكاران، بەتایبەت لەبارەی بەشە ناوخۆییەكان و دابینكردنی پێداویستییەكانیان و هاتوچۆی خوێندكاران، جێبەجێبكرێن و بەشێكیشیان جێبەجێكراون.
